ජනාධිපති මෛත්‍රීපාල සිරිසේන මහතාට එරෙහිව දෝෂාභියෝගයක් ගෙන ඒමට එක්සත් ජාතික පක්ෂ මන්ත්‍රීවරුන් පිරිසක් තුළ සුදානමක් පවතින බවට තොරතුරු වාර්තා වනවා.
එම දෝෂාභියෝගය කෙටුම්පත් කිරීමේ කටයුතු මේවන විටත් ආරම්භ කර ඇති බවයි පක්ෂ අභ්‍යන්තර ආරංචි මාර්ග සඳහන් කළේ.
ඒ අනුව එහි කෙටුම්පත් කටයුතු මෙම සතිය ඇතුළත නිමකිරීමට නියමිතව ඇති බව සඳහන්.
අනතුරුව පාර්ලිමේන්තුව රැස්වීමට නියමිත ලබන 23 වැනිදා එම කෙටුම්පතට මන්ත්‍රීවරුන්ගේ අත්සන් යොදාගැනීමටයි සැළසුම් කර ඇත්තේ.
මේවන විටත් ජනාධිපතිවරයාට එරෙහි දෝෂාභියෝගයකට තම පක්ෂය සහයදෙන බවට ජනතා විමුක්ති පෙරමුණ ප්‍රකාශ කර තිබෙනවා.
ඒ අනුව එම පක්ෂයේ මන්ත්‍රීවරුන් 06 දෙනාගේ සහය ඊට ලැබෙනු ඇති බවයි දේශපාලන ආරංචි මාර්ග සඳහන් කළේ.
අදාළ තොරතුරු සම්බන්ධයෙන් එක්සත් ජාතික පක්ෂ පාර්ලිමේන්තු මන්ත්‍රී චන්දිම ගමගේ මහතා කොළඹ දී අද(15) පැවති මාධ්‍ය හමුවකදී තහවුරු කර සිටියා.