ෆීල්ඩ් මාර්ෂල් සරත් ෆොන්සේකා මහතාට අමාත්‍ය ධුරයක් පිරිනැමීම පිළිබඳව ඇති අර්බුදය ඉදිරි දින කිහිපයේදී අග්‍රාමාත්‍ය රනිල් වික්‍රමසිංහ මහතා මැදිහත් වී නිරාකරණය කරගනු ඇතැයි අභ්‍යන්තර හා ස්වදේශ කටයුතු පළාත් සභා හා පළාත් පාලන අමාත්‍ය වජිර අබේවර්ධන මහතා පැවසීය.
සරත් ෆොන්සේකා මහතා අමාත්‍ය ධුරයක දිවුරුම් නොදුන්නේ ජනපතිගේ විරෝධය නිසාදැයි මාධ්‍යවේදියකු ඇසූ ප්‍රශ්නයකට පිළිතුරු දෙමින් අමාත්‍යවරයා මේ බව කීවේය.
“දේශපාලන ගැටලුවක් තියෙනවා. ඉදිරි දින කිහිපයේදී ඒවා විසඳා ගන්නට හැකිවේවි. සරත් ෆොන්සේකා මහතා දේශපාලනඥයකු මෙන්ම ෆීල්ඩ් මාර්ෂල් හැටියට ක්‍රියාකාරීත්වය ජනපති ආරක්ෂක ප්‍රධානියා ලෙස ගළපාගන්නේ කෙසේ දැයි මතයක් පැන නැගී තිබෙනවා.”
ෆොන්සේකා මහතා විශ්‍රාමික හමුදා නිලධාරියෙක්, ෆීල්ඩ් මාර්ෂල් විශ්‍රාමික නිලධාරියෙක් බවත් ඔහුට වෙනත් ධුර දැරිය හැකි බවත් ආරක්ෂක අමාත්‍යංශය මීට පෙර සඳහන් කර ඇතැයි වජිර අබේවර්ධන මහතා කීය.
කොළඹ අරලියගහ මන්දිරයේ පැවැති මාධ්‍ය හමුවකදී වජිර අබේවර්ධන මහතා මේ බව පැවසීය.