චීනයේ වූහාන් නගරයේ මේ වනවිට වෙසෙන ශ්‍රී ලාංකික සිසුන් 30 දෙනෙකු ලංකාවට ගෙන්වා ගැනීමට ජනාධිපතිතුමාගේ උපදෙස් මත විදේශ සබඳතා අමාත්‍යාංශය පියවර ගෙන ඇති නමුත් චීන බලධාරීන් විසින් කිසිදු පුද්ගලයෙක් එම ස්ථානවලින් ඉවත් කිරීමට ඉඩලබා දී නොමැති බව ජාත්‍යන්තර සහයෝගිතා රාජ්‍ය අමාත්‍ය සුසිල් ප්‍රේමජයන්ත මහතා පැවසීය.
අමාත්‍යවරයා මේ බව ප්‍රකාශ කළේ අද (28) අරලියගහ මන්දිරයේ පැවැති ප්‍රවෘත්ති සාකච්ඡාවකට සහභාගී වෙමිනි.
තත්ත්වය මෙසේ වුවද බීජිං නගරයේ ප්‍රධාන කාර්යාලය මගින් වූහාන් නගරයේ බලධාරීන් සම්බන්ධ කරගනිමින් ශ්‍රී ලාංකිකයින්ට අවශ්‍ය ආහාරපාන ලබාදීමට කටයුතු කර ඇතැයිද අමාත්‍යවරයා මෙහිදි වැඩිදුරටත් සඳහන් කළේය.
ශ්‍රී ලාංකිකයින් 557 දෙනෙක් පමණ චීනයේ වෙසෙන අතර, ඉන් 204 දෙනෙක් ඊයේ දිනයේදී චීනයේ සිට ලංකාව බලා ගමන් ආරම්භකර ඇති බවත්, 103 දෙනෙක් අද (28) දින පිටත්වීමට නියමිත බවත් ප්‍රකාශ කල අමාත්‍යවරයා බීජිංහි පිහිටි ප්‍රධාන කාර්යාලය ඇමතීමට චීනයේ වෙසෙන සියලුම ශ්‍රී ලාංකිකයින්ට අවස්ථාව සලසා දී ඇති බවත් කියා සිටියේය.
එම ප්‍රදේශවල ජීවත්වන ශ්‍රී ලාංකිකයින්ට පළාත් බලධාරීන් සහ ලෝක සෞඛ්‍ය සංවිධානය විසින් ලබාදෙන උපදෙස් පිළිපඳින ලෙස උපදෙස් ලබාදී තිබෙනවා. මේ වනවිට චෙන්ඩු නගරයේ ජීවත්වන අයට එම ප්‍රදේශවලින් ඉවත්විමට අවසර ඉල්ලා තිබෙනවා. එම ප්‍රදේශවලට විශේෂ ගුවන්යානා ගොඩ බැස්සවීමට අවසර ලැබෙන්නේ නැහැ. නමුත් වානිජ ගුවන්යානාවලට ඒ සඳහා බලපෑමක් නැහැ. ඒ නිසා අපි ශ්‍රී ලංකන් එයා ලයින් එකත් එක්ක කතා කරලා සියයට 50ක වට්ටම් සහිතව ගුවන් ගමන් බලපත්‍ර ලබා ගැනීමට අවශ්‍ය පහසුකම් සලසලා තිබෙනවා. මේ කාර්යය සඳහා චීනයේ තානාපති කාර්යාලයත් ෂැංහයි සහ වොහැංෂු උපකාර්යාල වලිනුත් තායිලන්තයේ ශ්‍රී ලංකා තානාපති කාර්යාලය හරහාත් මේ කටයුතු සම්බන්ධීකරණය කරලා තිබෙනවා යැයිද අමාත්‍යවරයා මෙහිදි වැඩිදුරටත් සඳහන් කළේය.