ජපානයේ විශාලතම වාණිජ බැංකුව වන බෑන්ක් ඔෆ් ටෝකියෝ මිට්සුබිෂි ලබන වසරේ මාර්තු මාසයේදී ශ්‍රී ලංකාවේ සිය නියෝජිත කාර්යාලයක් ආරම්භ කරන බව නිල වශයෙන් ප්‍රකාශ කර තිබෙනවා. ඒ සඳහා එම බැංකුව ජපාන මූල්‍ය නියාමන අධිකාරියේ අවසරය පතා ඇති බව සඳහන්. ජපාන ආයෝජකයන් වැඩි වශයෙන් ශ්‍රී ලංකාවට ආකර්ශනය කර ගැනීම සඳහා මෙම පියවර ඉවහල් වනු ඇති බව ජපාන මිට්සුබිෂි බැංකුව නිවේදනයක් නිකුත් කරමින් ප්‍රකාශ කර තිබෙනවා. මෙරට යටිතල පහසුකම්, ඉදිකිරීම් සහ සංචාරක කර්මාන්තවල ආයෝජන අවස්ථා පවතින අතර දැනටමත් ජපාන සමාගම් සියයකට වැඩි සංඛ්‍යාවක් මෙරට ආයෝජන සිදුකර ඇති බවයි එමඟින් පෙන්වා දී ඇත්තේ. බෑන්ක් ඔෆ් ටෝකියෝ මිට්සුබිෂි නියෝජිත කාර්යාලයක් ශ්‍රී ලංකාවේ පිහිටුවනු ලබන්නේ ශ්‍රී ලංකාව සහ ජපානය අතර ආයෝජන දිරිගැන්වීම සඳහා ඇතිකරගත් අවබෝධතා ගිවිසුමට අනුවයි.