නව සංවර්ධන ව්‍යාපෘති හා කර්මාන්ත හම්බන්තොටට එපා කියා කැරැලි ගසනවා නම් එය පොළොන්නරුවට ගෙන යෑමට තමා සූදානම් බව ජනාධිපති මෛත්‍රිපාල සිරිසේන මහතා ‘තිරසර යුගයක තෙවසරක ඇරැඹුම’ උත්සවයේදී ප්‍රකාශ කෙළේය.
රටේ යහපත සඳහා තමා තීන්දු තීරණ ගන්නා බවත් කවුරුවත් හිතන විදියට ආණ්ඩු පෙරළන්න ඉඩා නොතබන බවත් ආණ්ඩුව ශක්තිමත්ව ඉදිරියට යන බවත් ජනපතිවරයා එහිදී පැවැසීය.
ප්‍රශ්නවලට බියෙන් පලාගිය උදවිය අද අවුල් ඇති කරන බව කී ජනාධිපතිවරයා ඊට නොරැවටී රටේ ඉදිරි ගමන සඳහා එක්වන්නැයි ඉල්ලා සිටියේය.
ආණ්ඩු පෙරළන හිස් පුහු ඝෝෂාවලට සවන් යොමු නොකරන ලෙසත් මැතිවරණ ප්‍රතිඥාවේ සඳහන් සමමුතිවාදී ආණ්ඩුවට ලක්ෂ 62ක් ජනතාව එදා ඡන්දය දුන් බවත් ජනපති මතක් කළේය.
වත්මන් ආණ්ඩුව මාධ්‍යවේදීන්ගේ ලේ සොලවා නැති බවත්, කිසිම මාධ්‍යවේදියකු මහපාරේ මරා දමා නැති බවත්, කිසිම මාධ්‍යවේදියකු පසුගිය දෙවසර තුළ රට හැර නොගිය බවත්, ජනාධිපති සිරිසේන මහතා පැවැසීය.