ශ්‍රී ලංකා මහ බැංකුව පවසන්නේ සේවකයින්ගේ වැටුප් වැඩිකිරීම, 2024 – 2026 කාලසීමාව ආවරණය වන පරිදි වෘත්තීය සමිති සමග ඇති කර ගත් සාමූහික ගිවිසුම යටතේ පාලක මණ්ඩලය විසින් අනුමත කර ඇති බවයි.
කෙසේ වෙතත් ඒ පිළිබඳව පාර්ලිමේන්තුවේදී ඇතැම් මන්ත්‍රීවරුගේ අදහස් දැක්වීම් සම්බන්ධයෙන් සිය අවධානය යොමුවී ඇති බව නිවේදනයක් නිකුත් කරමින් මහ බැංකුවේ සන්නිවේදන දෙපාර්තමේන්තුව පැවසුවේය.
ඒ අනුව වැටුප් වැඩිකිරීම සම්බන්ධයෙන් පාර්ලිමේන්තු මන්ත්‍රීවරුන්ට කරුණු පැහැදිලි කිරීම සඳහා අවස්ථාවක් ලබා දෙන ලෙස මහ බැංකු අධිපතිවරයා විසින් පසුගියදා මුදල් අමාත්‍යවරයා ලෙස ජනාධිපති රනිල් වික්‍රමසිංහ මහතාගෙන් ඉල්ලීමක් සිදු කර ඇතැයි එම නිවේදනයේ දැක්වෙයි.
ඒ අනුව සුදුසු පාර්ලිමේන්තු කාරක සභාවක් හරහා මන්ත්‍රීවරුන්ට ඒ සම්බන්ධයෙන් දැනුවත් කිරීමට හැකි බවද එම නිවේදනයේ සඳහන් වේ.