මේ වනවිට රුසියාවේ මොස්කව්හි අගනුවර ආසන්නයේ පිහිටි රඟහලකට එල්ලවූ ත්‍රස්ත ප්‍රහාරයෙන් පුද්ගලයින් 60දෙනෙකු මිය ගොස් තවත් 100කට අධික පිරිසක් තුවාල ලබා ඇති බව වාර්තා වේ.
විදෙස් වාර්තා සඳහන් කළේ ප්‍රහාරයේ වගකීම අයි.එස්. සංවිධානය විසින් බාරගෙන ඇති බවය.
රුසියාවේ මොස්කව් නගරය ආසන්නයේ ක්‍රස්නොගෝර්ස්ක්හි පිහිටි රංග ශාලාවක වෙඩි තැබීමක් සිදුකර තිබුණි.
විදෙස් වාර්තා සඳහන් කළේ හමුදා සාමාජිකයින් ට සමාන ඇඳුමින් සැරසුණු ප්‍රහාරකයින් සිව්දෙනෙකු ප්‍රසංගයක් පැවති අදාළ ගොඩනැගිල්ලට කඩා වැදී වෙඩි තබා, අත්බෝම්බ ප්‍රහාරයක් එල්ල කර ඇති බවය.
වෙඩි තැබීම සිදුකර තිබුණේ රොක් සංගීත කණ්ඩායමක් පවත්වන සංගීත සංදර්ශනයක් ආරම්භ වීමට මොහොතක් තිබියදීය.
සංගීත කණ්ඩායම වේදිකාවට පැමිණීමට මිනිත්තු කිහිපයකට පෙර ප්‍රහාරය සිදුවූ අතර සංගීත කණ්ඩායමේ සාමාජිකයින්ට ඉන් හානියක් සිදුව නොමැති බව ද වාර්තා වේ.
ආසන 6,200කින් සමන්විත රංග ශාලාව ඒ මොහොතවන විට ජනතාවගෙන් පිරී පැවති බව විදෙස් මාධ්‍ය සඳහන් කළේය.
ප්‍රහාරයත් සමඟ ප්‍රසංගය පැවති ශාලාව තුළ ගින්නක් ද හටගෙන ගෙන තිබේ.
මොස්කව් නගරාධිපති සර්ජි සොබියානින් පැවසුවේ සන්නද්ධ පුද්ගලයන් දෙදෙනෙකු හෝ පස් දෙනෙකු අතර පිරිසක් ආරක්ෂකයින්ට වෙඩි තබා පසුව ප්‍රේක්ෂකයන්ට වෙඩි තැබීම සිදුකර ඇති බවය.
විනාඩි 15 ක් හෝ 20 ක් කාලයක් ප්‍රහාරය සිදුකර ඇති බව සඳහන් වේ.
තුවාල ලැබූවන් අතර කුඩා ළමුන් ද සිටින අතර රුසියානු විදේශ අමාත්‍යාංශය “මෙම ත්‍රස්ත ප්‍රහාරය” හෙළා දකින බව සඳහන් කර තිබේ.
මේ වනවටි රුසියාවේ මොස්කව්හි ආරක්ෂාව තරකර ඇති අතර, එක්සත් ජනපද තානාපති කාර්යාලය එක්සත් ජනපද පුරවැසියන්ට විශාල රැස්වීම්වලින් වළකින ලෙස අනතුරු ඇඟවීමක් කළේ, “මොස්කව්හි විශාල රැස්වීම් ඉලක්ක කිරීමට අන්තවාදීන්ට ආසන්න සැලසුම් ඇති” බවට වන වාර්තා අධීක්‍ෂණය කර තිබූ පසුබිමකය.
ප්‍රහාරය සඳහා පැමිණි තුවක්කුකරුවන් පසුව සුදු පැහැති මෝටර් රථයකින් පළාගොස් ඇති බව සඳහන් වේ.