රට තුළ කොරෝනා වෛරසය පැතිරීම සම්බන්ධයෙන් තබ්ලික් ජමාත් ඉස්ලාම් සංවිධානය විවේචනය කළ බවට චෝදනා කරමින් ඉන්දියාවේ උත්තර් ප්‍රදේශ් හි ප්‍රයග්‍රාජ් හි පදිංචිකරුවෙකු ඔහුගේ නිවස අසල තේ කඩයක් තුලදී වෙඩි තබාඝාතනය කර ඇත.
මියගිය පුද්ගලයා නයිසාමුදීන් හි තබ්ලිගි ජමාත් සමුළුව පිළිබඳව අදහස් දක්වමින් කොරොන වෛරස් රෝගීන් සිය ගණනක් ප්‍රාන්ත පුරා අනාවරණය වී ඇත්තේ මෙම සමුළුව නිසා බව පවසා ඇත. එහිදී ඔහු තේ කඩයේ සිටි තවත් පුද්ගලයෙකු සමඟ බහින්බස් වීමක් ඇති වී තිබේ.
ඊයේ (5) ඉරිදා උදෑසන 9.30 ට පමණ දෙදෙනා අතර බහින්බස් වීමක් සිදුව ඇති අතර ඒ අවස්ථාවේදී වෙඩි තැබීම සිදු වී ඇත.
වෙඩි ප්‍රහාරයට ලක්වූ පුද්ගලයා එම ස්ථානයේදීම මිය ගොස් ඇති අතර ප්‍රදේශවාසීන් විසින් වෙඩි තැබූ පුද්ගලයා අල්ලා පොලිසියට භාර දී ඇත.
මේ අතර, සාමය පවත්වා ගෙන යන ලෙසත්, මෙම සිද්ධිය සම්බන්ධයෙන් නොසන්සුන්තාවයක් ඇති නොකරන ලෙසත් ප්‍රදේශයේ ජේෂ්ඨ පොලිස් අධිකාරී වරයා ජනතාවගෙන් ඉල්ලා තිබේ.
මියගිය පුද්ගලයාගේ පවුලට රුපියල් ලක්ෂ 5 ක වන්දියක් උත්තර් ප්‍රදේශ් රජය විසින් ලබාදීමට කටයුතු කර තිබේ.