ඌව පළාත් සභාවේ මහඇමති චාමර සම්පත් දසනායක මහතා විසින් බදුල්ල දෙමළ බාලිකා විදුහලේ විදුහල්පතිනිය වන භවානි රගුනාත් මහත්මිය දණ ගැස්සවිමේ සිද්ධියට විරුද්ධව නිතිය ක්‍රියාත්මක කරන ලෙස එක්සත් ජාතික පක්ෂ පාර්ලිමේන්තු මන්ත්‍රී කාවින්ද ජයවර්ධන මහතා ඉල්ලා සිටිනවා.
මෙම ක්‍රියාවට විරුද්ධව ශ්‍රී ලංකා නිදහස් පක්ෂයෙන් විනය ක්‍රියාමාර්ග ගන්නා ලෙසත්, මහඇමති තනතුරෙන් නෙරපන ලෙසත් ඉල්ලා සිටි මන්ත්‍රීවරයා, මහ ඇමතිවරයාට කොන්දක් තිබෙනවානම් තනතුරෙන් ඉල්ලා අස් වෙන ලෙසත් ප්‍රකාශ කර සිටියා.
ජනාධිපතිවරයාගේ කඩුව ඒ පැත්තටත් කැපෙනු ඇතැයි විශ්වාසය පල කල කාවින්ද ජයවර්ධන මන්ත්‍රීවරයා, එය සාමුහික වගකීමක් බවත් මෙම ක්‍රියාව යහපාලන ආණ්ඩුවට එල්ලවුණු කළු පැල්ලමක් වගේම කිරි කාලයක් දොවලා දැම්ම ගොම බින්දුවක් බවත් අවධාරණය කර සිටියා.
එක්සත් ජාතික පක්ෂය මේ වනවිටත් ආදර්ශමත් වී පෙන්වා ඇති බවත් ශ්‍රී ලංකා නිදහස් පක්ෂයටත් ආදර්ශමත් වීමට අවස්ථාව පැමිණ ඇති බවත් පාර්ලිමේන්තු මන්ත්‍රී කාවින්ද ජයවර්ධන මහතා පෙන්වා දුන්නා.
දර්ශන අනුග්‍රහය: Colombo Media Network