ඊයේ (02) අත්අඩංගුවට ගැනීමට ගුවන්තොටුපොළ පොලීසිය අපරාධ කොට්ඨාශයේ නිලධාරින් සිදුකළ මත්කුඩු සෝදිසි මෙහෙයුමක් අතරතුර පළාගිය සැකකරුවෙකු රටින් පළායාම සඳහා කටුනායක ගුවන් තොටුපොළට පැමිණි අවස්ථාවේ සමත්ව තිබේ.
සැකකරු ඩුබායි රාජ්‍ය බලා පිටත්ව යාමට සූදානම්ව සිටි බව වාර්තා වෙයි.
ඉකුත් දෙසැම්බර් 31වනදා වැලිගම දෙනිපිටිය ප්‍රදේශයේදී පොලීසිය සිදුකළ වැටලීමකදී ත්‍රිරෝද රථයක ශබ්ද විකාශන යන්ත්‍රයක් තුළ තිබී හෙරොයින් මත්ද්‍රව්‍ය තොගයක් සොයාගැනුණු අතර රථය පදවාගෙන ආ මෙම පුද්ගලයා එහිදී පළාගොස් තිබුණි.
වැලිගම මිදිගම ප්‍රදේශයේ පදිංචි 30 හැවිරිදි පුද්ගලයෙක් වන සැකකරු ප්‍රබල මත්ද්‍රව්‍ය ජාවාරම්කරුවෙකු වන බව හෙළිවී ඇත.
සැකකරුට එරෙහිව වැලිගම පොලීසිය විදෙස් ගමන් තහනමක්ද ලබාගෙන තිබුණේ විමර්ශනවලට අදාළවය.
සැකකරුව මාතර මහෙස්ත්‍රාත් අධිකරණයට අද (03) පෙරවරුවේ ඉදිරිපත් කිරීමෙන් පසු දින 7ක් රඳවා තබාගෙන ප්‍රශ්න කිරීමට වැලිගම පොලීසියට අවසර හිමිව තිබේ.