කල්මුණේ, සමන්තුරේ, පොතුවිල්, මැතිවරණ කොට්ඨාස එකතු කර රටේ 26 වැනි පරිපාලන දිස්ත්‍රික්කය ස්ථාපිත කළයුතු බව සමස්ත ලංකා මහජන කොංග්‍රස් නායක අමාත්‍ය රිෂාඩ් බදියුදීන් මහතා සඳහන් කරයි.
සමස්ත ලංකා මහජන කොංග්‍රසය හා එක්සත් සාම සන්ධානය එක්ව සකස් කළ එක්සත් ජනතා සන්ධානය දැනුවත් කිරීමේ මාධ්‍යහමුවට සහභාගි වෙමින් ඊයේ (10දා) මේ බව කී අමාත්‍යවරයා වැඩිදුරටත් සඳහන් කළේ එක්සත් ජනතා නිදහස් සන්ධානයේ ප්‍රතිපත්ති ප්‍රකාශයටද මෙම කරුණ ඇතුළත් කර තිබෙන බවයි.
මෙහිදී ජනවර්ගයට අවශ්‍ය පහසුකම් සහිතව නව පරිපාලන දිස්ත්‍රික්කය නිර්මාණය කළයුතු බවත්, රටේ පරිපාලන කටයුතුවලදී භාෂාමය වශයෙන් නොයෙකුත් ගැටලුවලට අම්පාර දිස්ත්‍රික්කයේ මෙම කොට්ඨාස තුනෙහි ජීවත්වන දෙමළ ජනතාව මුහුණදෙන බවත් ඔහු පවසා සිටියේය.