දේශපාලන සිරකරුවන් (කොටි ත්‍රස්තවාදී සිරකරුවන්) නිදහස් කරන ලෙස ඉල්ලමින් රාජ්‍ය නොව සංවිධාන ක්‍රියාකාරීහු පිරිසක් ඊයේ වැලිකට බන්ධනාගාරය ඉදිරිපිට විරෝධතාවක් පැවැත්වූහ.
අලුත් පරපු, ලංකා ගුරු සංගමය, අන්තර් විශ්වවිද්‍යාල ශිෂ්‍ය බලමණ්ඩලය, නව සම සමාජ පක්ෂය, එක්සත් සමාජවාදී පක්ෂය, නව ප්‍රජාතන්ත්‍රවාදී පක්ෂය ආදී රාජ්‍ය නොවන සංවිධාන, සිවිල් ක්‍රියාකාරීන් හා වෘත්තීය සමිති නියෝජිතයන් පිරිසක්ද ඊට එක්ව සිටියහ.
නඩු නොදමා වසර ගණනාවක් තිස්සේ බන්ධනාගාර ගත කර සිටින දේශපාලන සිරකරුවන් මුදා නොහැරීම නිසා ඔවුනගේ මානව හිමිකම් කඩවන බව විරෝධතාකරුවෝ පැවසූහ.
සිරගත කර සිටි කොටි සැකකරුවන්ගෙන් පිරිසක් රජය පසුගිය සමයේ නිදහස් කරන ලද අතර මේ වන විට සිරගත කර සිටින්නේ බෝම්බ ප්‍රහාර, මරාගෙන මැරෙන ප්‍රහාර හා සමූහ මිනිස් ඝාතනවල නියැළු, ප්‍රහාර සැළසුම් කළ සහ ඒ සදහා පුහුණුව ලැබූ දරුණු ගණයේ ත්‍රස්තවාදී සැකකරුවන්ය.
