එල්ටීටීඊ සංවිධානයේ භාෂා පරිවර්තකයා ලෙස කටයුතු කළ ජෝර්ජ් මාස්ටර් හෙවත් වේලුපිල්ලේ කුමාර් පංචරත්නම් ජීවිතක්ෂයට පත්ව තිබේ.
යාපනය පේදුරුතුඩුව ප්‍රදේශයේ පදිංචිකරුවෙකු වූ මොහු , මිය යන විට අසූ පස් වන වියෙහි පසු විය.
කෝපායි ප්‍රදේශයේ වැඩිහිටි නිවාසයක රැඳී සිටියදී ඊයේ (05)දින පස්වරුවේ ඇතිවූ හදිසි හෘදයාබාධයක් හේතුවෙන් ජෝර්ජ් මාස්ටර් මෙසේ මියගොස් ඇති බව පොලිසිය පවසයි.
හිටපු තැපැල් නිලධාරියකු වන ජෝර්ජ් මාස්ටර් එල්ටීටීඊ සංවිධානය ක්‍රියාකාරීව පැවති සමයේ එම සංවිධානයේ ප්‍රධාන භාෂා පරිවර්තකයා ලෙස කටයුතු කළ අතර ඔහු කොටි සංවිධානය දේශපාලන අංශ නායක තමිල් චෙල්වම් සමග ද සමීපව කටයුතු කර තිබේ.
යුද්ධය නිමාවේ යුදකලාපයෙන් පිටව අනාථ කඳවුරකට පැමිණීමෙන් පසු අත්අඩංගුවට පත්වූ ජෝර්ජ් මාස්ටර් නීතිපති උපදෙස් මත හත්වසරකට පසු 2016 ජුලි 04 දා ඇප මත මුදා හරිනු ලැබුණි.
ජාත්‍යන්තර අර්බුද පිළිබඳ සමූහයේ ජ්‍යෙෂ්ඨ උපදේශක ඇලන් කීනන් මේ පිළිබඳ තබා ඇති සටහනක දැක්වෙන්නේ ජෝර්ජ් මාස්ටර් සමඟ බොහෝ රහස් ද වැළලී යනු ඇති බවය.