උතුරුදිග ප්‍රංශයේ රෝන් හි කතෝලික පල්ලියකදී 84 හැවිරිදි පූජකවරයෙකුගේ ගෙල කපා ඝාතනය කිරීමෙන් පසු බ්‍රිතාන්‍යෙයේ සියළුම පල්ලිවල ආරක්ෂාව තර කිරීමට බ්‍රිතාන්‍ය බලධාරීන් තීරණය කර තිබේ.
ප්‍රංශ ජාතික ඉල්සාමීය රාජ්‍ය ත්‍රස්තවාදීන් දෙදෙනෙකු පල්ලියට කඩා පැන ජැක් හැමල් නමැති වයෝවෘද්ධ පූජකවරයකුගේ ගෙල කපා ඝාතනය කර තිබුණේ ඉකුත් ජූලි 27 වනදායි. පසුව ප්‍රංශ පොලීසිය විසින් ඔවුන් දෙදෙනා වෙඩි තබා මරා දමන ලදි.
බ්‍රිතාන්‍ය තුළ ක්‍රිස්‌තියානි සහ කතෝලික පල්ලි හතළිස්‌ හත්දහසක්‌ තිබේ. ඒ සියල්ලෙහිම ආරක්ෂාව තර කොට හදිසි අවස්‌ථාවකදී ගතයුතු ක්‍රියාමාර්ග පිළිබඳව උපදෙස්‌ දී තිබෙන බව නියෝජ්‍ය පොලිස්‌ කොමසාරිස්‌ නීල් බාෂ් පවසයි.
බ්‍රිතාන්‍ය පල්ලිවලට පහර දීමක්‌ පිළිබඳව මෙතෙක්‌ බුද්ධි අංශවලට වාර්තා වී නැතත් සියලු දෙනාම සීරුවෙන් සිටිය යුතු බව ඔහුගේ අදහසයි. බ්‍රිතාන්‍ය තුළ ක්‍රිස්‌තියානි සහ කතෝලික ලියාපදිංචි බැතිමතුන් මිලියන 5.4 ක්‌ සිටින අතර පල්ලියට යැමේදී පරික්‌ෂාකාරී වන ලෙස නියෝජ්‍ය පොලිස්‌පතිවරයා සියල්ලන් ගෙන්ම ඉල්ලීමක්‌ කර ඇත.