ඉදිරි කාලය තුළ පවතින ආණ්ඩුවට විරුද්ධව කුමන බලවේගයක් නිර්මාණය කළත් එහි මූලිකත්වය ගන්නා සියල්ලන් ශ්රීලනිපයෙන් නෙරපා හරින්නට සියලූ සැලසුම් සකස් කර ඇතැයි ශ‍්‍රීලනිප ජ්‍යෙෂ්ඨයෙක් ප‍්‍රකාශ කළේය.
ශ‍්‍රීලනිපයේ හිඳිමින්ම එක්තරා කල්ලියක් මේ අවස්ථාව වනවිට බැසිල් රාජපක්ෂ සමග පක්ෂය දෙකඩ කිරීමට ජන හමු පවත්වමින් යන බවද ඔවුන් ශ්රීලනිපයෙන් ඉවත් නොවී ආණ්ඩු විරෝධී බලවේගයක් ගොඩනඟන බව කීවද කුමන හෝ වේශයකින් නව පෙරමුණක් හෝ පක්ෂයක් කරලියට පැමිණියහොත් එයට සම්බන්ධ වන සියල්ලන් පක්ෂයෙන් නෙරපා හරින බවද ඒ මහතා වැඩිදුරටත් ප‍්‍රකාශ කළේය.
කයිවාරු වලට බය නැ :
මේ පිළිබඳව ඒකාබද්ධ විපක්ෂය නියෝජනය කරන මන්ත‍්‍රීවරයකුගෙන් කරුණු විමසීමේදී ඒ මහතා ප‍්‍රකාශ කළේ තම කණ්ඩායම ආණ්ඩු විරෝධී බලවේගයක් ගොඩනැගීම දැනටමත් ආරම්භ කර ඇති බවය.
තම කණ්ඩායම ශ‍්‍රීලනිප ජ්‍යෙෂ්ඨයන්ගේ කයිවාරු වලට බය නැති බවද ප‍්‍රකාශ කළ ඒ මහතා, තමන් ඇතුළු කණ්ඩායම පක්ෂයෙන් ඉවත් කිරීම පහසු නැති බවද ප‍්‍රකාශ කළේය.
චන්ද්‍රිකා යලි රාජපක්ෂවරුන්ට එරෙහිව :
මේ අතර පසුගිය 6 වැනි දින රාත‍්‍රියේදී අහුන්ගල්ල ප‍්‍රදේශයේ හෝටලයකදී සාදයක් සමග සාකච්ඡාවක් පැවැත්වී ඇති අතර, එයට චන්ද්‍රිකා කුමාරතුංග, මහින්ද අමරවීර, අතාවුද සෙනෙවිරත්න, රෙජි නෝල්ඞ් කුරේ, ඉසුර දේවප‍්‍රිය, දුමින්ද දිසානායක ආදි ශ‍්‍රීලනිපයේ ජ්‍යෙෂ්ඨයන් බොහෝ ප්රමාණයක් සහභාගි වී ඇත.
එහිදීද පක්ෂයේ ඉදිරි ප‍්‍රතිසංවිධානය සහ විශේෂයෙන් බැසිල් රාජපක්ෂ මූලිකත්වයෙන් ගොඩනැෙඟන බලවේගයට විරුද්ධව කටයුතු කරන්නේ කෙසේදැයි සාකච්ඡාවට ලක්වී ඇත.
(රාවය)