කැබිනට් මණ්ඩලයේ සාමාජික ඇමතිවරුන් පස් දෙනෙකු ඊයේ (ජූලි 10)දිනය වන විට තනතුරුවලින් ඉල්ලා අස්වූ බව ප්‍රකාශ කොට තිබේ.
සංචාරක හා ඉඩම් ඇමැති හරින් ප්‍රනාන්දු සහ කම්කරු හා විදේශ රැකියා ඇමති මනුෂ නානායක්කාර යන ඇමතිවරු පෙරේදා සිය ඇමැති තනතුරු අත්හැරියහ.
කෘෂිකර්ම, වනජීවී හා වන සම්පත් ඇමති මහින්ද අමරවීර පොහොර නැව භාර ගැනීමෙන් අනතුරුව ඊයේ පෙරවරුවේ සිය ඇමති ධූරයෙන් ඉල්ලා අස්විය.
ආයෝජන ප්‍රවර්ධන ඇමති ධම්මික පෙරේරාද ඊයේ දහවල් සිය ඇමැති ධූරයෙන් ඉල්ලා අස්වී ඇති බව ප්‍රකාශයට පත් කෙරිණි. ධම්මික පෙරේරා ඇමැති ධූරයේ කටයුතු කළේ දින 16ක් පමණි.
වරාය, නාවික හා ගුවන් සේවා ඇමති නිමල් සිරිපාල ද සිල්වා ජනාධිපතිවරයාගේ දැනුම් දීමට අනුව ඉකුත් බදාදා සිය ඇමති තනතුරෙන් ඉල්ලා අස්විය.
ඇමැතිවරුන් පත්කරනු ලබන්නේ ජනාධිපතිවරයා විසින් බැවින් ඔවුන් ඉල්ලා අස්වීමේ ලිපිය භාර දිය යුත්තේ ජනාධිපතිවරයාට ය.
ජනාධිපතිවරයා සිටින තැනක් මෙතෙක් අනාවරණය වී නොමැති බැවින් ඉල්ලා අස්වූ බව ප්‍රකාශ කරන කිසි ම ඇමතිවරයෙකුට සිය ඉල්ලා අස්වීමේ ලිපිය භාර දීමට ද අවස්ථාවක් ලැබී නැත.