ශ්‍රී ලංකා නිදහස් පක්ෂයේ 65 වැනි සංවත්සරයට සහභාගී වන ලෙස පක්ෂයේ අනුශාසකවරයෙකු වන හිටපු ජනාධිපති මහින්ද රාජපක්ෂ මහතාට අගහැරුවාදා රාත්‍රියේ ආරාධනා කර තිබේ.
ශ්‍රීලනිප ජ්‍යෙෂ්ඨ උප සභාපති කම්කරු ඇමති ජෝන් සෙනවිරත්න මහතා විසින් මෙම ආරාධනාපත්‍රය හිටපු ජනාධිපතිවරයාට බාර දී ඇති අතර, කුරුණෑගල දී සැප්තැම්බර් 4 වැනි දා පැවැත්වෙන සමුළුවට සහභාගී වීමට බලාපොරොත්තු වන බව රාජපක්ෂ මහතා එහි දී කියා ඇති අතර ඔහු ඇරයුම සතුටින් බාරගත් බව ද ඇමැතිවරයා පවසයි. ශ්‍රී ලංකාවේ සිටියහොත් තමා ශ්‍රී ලංකා නිදහස් පක්ෂයේ 65 වැනි සංවත්සරයට සහභාගි වන බව හිටපු ජනාධිපති මහින්ද රාජපක්ෂ මහතාට ආරාධනා පත්‍රය භාරදීමට ගිය අවස්ථාවේ ඔහු තමාට පැවැසු බවද ඇමතිවරයා පවසයි.
කෙසේ වෙතත් බන්ධනාගාරගතව සිටින නාමල් රාජපක්ෂ මහතා බැලීමට බන්ධනාගාරයට පැමිණි අවස්ථාවේ මාධ්‍යවේදීන් හමුවේ හිටපු ජනාධිපති මහින්ද රාජපක්ෂ මහතා ප්‍රකාශ කර ඇත්තේ, නාමල් රාජපක්ෂ මහතා සම්බන්ධයෙන් ආණ්ඩුව ගන්නා පියවර හා, ශ්‍රීලනිපයේ තමන්ට හිතවත් මන්ත්‍රීවරුන් සම්බන්ධයෙන් පක්ෂය අනුගමනය කරන පිළිවෙත සම්බන්ධයෙන් සලකා බලා සැප්තැම්බර් 4 පැවැත්වෙන පක්ෂ සමුළුවට සහභාගී වනවාද නැද්ද යන්න තීරණය වනු ඇති බවයි.