විදුලි ගාස්තුව සංශෝධනය කිරීමට යෝජනාවක් ඉදිරිපත් කොට ඇති බව ත් එසේ වුවහොත් විදුලි ගාස්තුව තුන් හතර ගුණයකින් ඉහළ යා හැකි බව ත් විදුලිබල හා බලශක්ති අමාත්‍ය කංචන විජේසේකර පවසයි.
විශේෂයෙන් අඩු ආදායම්ලාභීන් පීඩාවට පත් නොවන ලෙස විදුලිය ගාස්තුව සංශෝධනය කිරීමට සැලසුම් කරන බවත් මෙහිදී අධික විදුලි පරිභෝනයක් ඇති කර්මාන්ත, හෝටල් ඇතුළු හඳුනාගත් ක්ෂේත්‍ර කිහිපයක ගාස්තු සංශෝධනය වන බව ද අමාත්‍යවරයා සඳහන් කරයි.
සමස්තයක් ලෙස ගත්කල විදුලි ඒකකයක් නිෂ්පාදනය කිරීම සඳහා රුපියල් 47.18ක මුදලක් වැය වන බව ද අමාත්‍යවරයා අවධාරණය කරයි. මෙම විදුලි බිල් ගාස්තු සංශෝධනය කැබිනට් මණ්ඩල අනුමැතියෙන් හා මහජන උපයෝගිතා කොමිසම අවසරයෙන් සිදු කිරීමට බලාපොරොත්තු වන බව ද අමාත්‍යවරයා කියා සිටී.
අධික ලෙස විදුලිය භාවිත කරන්නන් සූර්ය පැනල සඳහා කඩිනමින් ප්‍රවේශ වන ලෙසත් රජයේ රෝහල්, පාසල්, රජයේ ගොඩනැගිලිවලටද සූර්ය පැනල සවි කිරීමේ හැකියාව පිළිබඳ සොයා බලන බව ද අමාත්‍යවරයා වැඩිදුරටත් සඳහන් කරයි.