මිග්යානා ගනුදෙනුව සම්බන්ධයෙන් සිදුකරන විමර්ශනවල සැකකරුවකු වන රුසියාවේ හිටපු ශ්‍රී ලංකා තානාපති උදයංග වීරතුංග මහතා එක්සත් එමීර් රාජ්‍යයේ බන්ධනාගාරගත කර සිටින්නකු බැවින් ඔහුගේ කැමැත්ත පරිදි ශ්‍රී ලංකාවට පැමිණීමේ හැකියාවක්‌ නැතැයි නීතිපතිවරයා ඊයේ (29දා) කොටුව මහෙස්‌ත්‍රාත් අධිකරණයට දැනුම් දුන්නේය.
ඔහු මෙරටට පැමිණීමට කැමැත්තක් ඇත්නම් ඒ බව එක්සත් අරාබි එමීර් රාජ්‍යයේ ෆෙඩරල් අධිකරණයට සඳහන් කර අවසර ලබා ගන්නා ලෙසද නීතිපති දෙපාර්තමේන්තුව අධිකරණයට දැනුම් දුන්නේය.
රුසියාවේ හිටපු තානාපති උදයංග වීරතුංග අධිකරණය හමුවේ පෙනී සිටීමට සූදානමින් සිටින බව මිග් යානා ගනුදෙනුවේදී සිදුව ඇති වංචාවට අදාළ නඩුව කොළඹ කොටුව මහේස්ත්‍රාත් ලංකා ජයරත්න මෙනෙවිය හමුවේ අද කැඳවූ අවස්ථාවේදී ඔහුගේ නීතිඥවරයා අධිකරණයට දැනුම් දී ඇත.
එම අවස්ථාවේ නීතිපතිවරයා නියෝජනය කරමින් අධිකරණයට කරුණු දැක්වූ රජයේ නීතිඥ උදාර කරුණාතිලක මහතා මේ බව සඳහන් කර තිබේ.