පැනමා පත්‍රිකා පාදක කරගනිමින් ඇතැම් පිරිස් තම පක්ෂයට සහ අමාත්‍ය පාඨලී චම්පික රණවක මහතාට එරෙහිව මඩ ව්‍යාපාරයක් ආරම්භ කර ඇතැයි ජාතික හෙළ උරුමය පවසනවා. එහි මාධ්‍ය ප්‍රකාශක නිශාන්ත ශ්‍රී වර්ණසිංහ මහතා පෙන්වා දෙන්නේ අමාත්‍ය පාඨලී චම්පික රණවක මහතාගේ උපදේශකවරයෙකු වන විද්‍යා අමරපාල මහතාගේ නම පැනමා පත්‍රිකාවලට ඈඳා කතා කිරීම ඊට උදාහරණයක් බවයි. බත්තරමුල්ලේ පිහිටි සිය කාර්යාලයේ අද (11) පැවැත් වූ මාධ්‍ය හමුවකදී ඔහු මේ බව පැවසුවා.
චෝදනාවට ලක්වන විද්‍යා අමරපාල මහතා ද මෙම මාධ්‍ය හමුවට සහභාගි වී සිටියා. ඔහු කියා සිටියේ තමන්ට සිදුකළ අපහාසය සම්බන්ධයෙන් ජනතා විමුක්ති පෙරමුණේ නායක අනුර කුමාර දිසානායක මහතා සහ ජාතික නිදහස් පෙරමුණේ මාධ්‍ය ප්‍රකාශක මොහොමඞ් මුසම්මිල් මහතා පැය 24ක් ඇතුළත සමාව ඉල්ලා සිටිය යුතු බවයි. නැතහොත් ඔවුන්ට එරෙහිව නඩු පවරන බවද ඔහු කියා සිටියා.