දෙමළ ජනතාවගේ ප්‍රශ්නයට එකම විසදුම උතුරු නැගෙනහිර පළාත් එක්කර ෆෙඩරල් පාලනයක් ලබාදීම පමණක් බව උතුරට පැමිණි සියළු විදේශ නියෝජිතයන්ට තමන් පැවසූ බව උතුරු පළාත් ප්‍රධාන අමාත්‍ය සී.වී. විග්නේෂ්වරන් පවසයි.
ඉකුත් කාලසීමාව තුළ රටවල් හයක තානාපතිවරුන් හා යුරෝපා සංගමයේ නියෝජිතයන් උතුරු පළාතේ සංචාරය කරමින් ප්‍රධාන අමාත්‍යවරයා සමග සාකච්ඡා පවත්වා ඇති අතර එහිදී සාකච්ඡා වූ කරුණු මොනවාදැයි යාපනයේදී මාධ්‍යවේදීන් විමසූ අවස්ථාවේදීයි ඔහු මෙලෙස පැවසුවේ.
වැඩිදුරටත් කරුණු අනාවරණය කරමින් ශ්රී ලංකාව තුල සිදුවූ යුද අපරාධ සම්බන්ධයෙන් පමණක් නොව වෙනත් ඕනෑම කටයුත්තක් සම්බන්ධයෙන් සිදු කෙරෙන පරීක්ෂණවලදී රට තුල සිදුවන කවර අන්දමක හෝ යාන්ත‍්‍රණයකට විරුද්ධ බවත්, ඒ පිළිබඳ සලකා බැලීමක් හෝ සිදු කරන්නේ ජාත්‍යන්තර විනිසුරුවරුන්ගෙන් සමන්විත යාන්ත‍්‍රණයක් පැමිණියහොත් පමණක් බවත්, මීළග ජිනීවා මානව හිමිකම් කමිටු රැස්වීමේදී මෙම සියළු තොරතුරු එක්සත් ජාතීන්ගේ සංවිධානය වෙත ඉදිරිපත් කරන බවද ප්‍රධාන අමාත්‍යවරයා අවධාරණය කළා.