පළාත් පාලන මැතිවරණය පැවැත්වෙන දින මැතිවරණ නීති උල්ලංඝනය කරන, ප්‍රචණ්‌ඩකාරීව හැසිරෙන ඕනෑම පුද්ගලයකු තරාතිරම නොබලා අත්අඩංගුවට ගෙන ඔවුන්ට එරෙහිව දැඩිව නීතිය ක්‍රියාත්මක කරන ලෙස පොලිස්‌පති පූජිත් ජයසුන්දර මහතා සියලුම පොලිස් ස්‌ථානාධිපතිවරුන්ට නියෝග කර ඇත.
පළාත් පාලන ආයතන මැතිවරණය ඉතාම සාමකාමී සාධාරණ අයුරින් පැවැත්වීමට අවශ්‍ය සියලු ක්‍රියාමාර්ග නොපැකිලිව ගන්නා ලෙසත්, දේශපාලනඥයන්ගේ බලපෑම් හමුවේ නම්‍යශීලී නොවී කොන්ද කෙළින් තබාගෙන රාජකාරි කිරීමට වගබලා ගත යුතු බවත් පොලිස්‌පතිවරයා පොලිස් ස්‌ථානාධිපතිවරුන්ට උපදෙස්‌ ලබා දී තිබේ.
මැතිවරණ දිනයේ පක්‍ෂග්‍රාහීව කටයුතු කරන පොලිස් ස්‌ථානාධිපතිවරුන් පිළිබඳව තොරතුරු වෙතොත් වහාම තමන් වෙත දන්වා සිටින ලෙස පොලිස්‌පතිවරයා ඉල්ලා සිටියි.
එවැනි නිලධාරීන් පිළිබඳ තොරතුරු සැලවුවහොත් ඔවුන්ට එරෙහිව නීතිය ක්‍රියාත්මක කිරීමට කටයුතු කරන බව ද පූජිත් ජයසුන්දර මහතා කියා සිටියි.