ජාතික තරුණ සේවා සභාවට අයත්, මහනුවර බෙල්වුඩ් සෞන්දර්ය නිකේතනය අලුත්වැඩියා කිරීමේ මුවාවෙන් ගලවා ඉවත් කිරීමේ සැලසුමක්‌ ක්‍රියාත්මක වෙමින් තිබේ.
ස්‌කොට්‌ලන්තයෙන් ගෙන්වන ලද යකඩ කණු බාල්ක යොදා සවි ශක්‌තිමත් ලෙස ඉදිකොට ඇති මෙම ගොඩනැඟිල්ලේ ඉහළ මාලයන් හි තට්‌ටු සහ තරප්පු පෙළ සවි ශක්‌තිමත් ලීයෙන් එංගලන්ත ජාතිකයන් විසින් තනා තිබේ. එම ලී යකඩ සහ මෙම ගොඩනැඟිල්ලෙහි සවිකොට තිබෙන රුපියල් කෝටි 3.5 ක් වටිනා අකුණු සන්නායකය ඇතුළු ඇලුමිනියම් තහඩු ස්‌ලයිඩ් ජනේල විකුණා දැමීමේ රහසිගත සැලසුමක්‌ ඇති බවට ප්‍රදේශවාසීහු චෝදනා කරති.
ප්‍රදේශවාසීන්ගේ දැනුම්දීමෙන් අනතුරුව බෙල්වුඩ් සෞන්දර්ය නිකේතනයේ පෙරේදා (2 දා) සිදුකළ භාණ්‌ඩ හිස්‌ කිරීමේ කටයුතු සොයා බැලීමට එහි ගියද, එම සීමාවට හෝ ඇතුළුවීමට ඉඩක්‌ ස්‌ථාන භාර නිලධාරි තැන හෝ ආරක්‍ෂක අංශ ලබා නොදුන්හ.
ඉකුත් පෙබරවාරි 01 වැනි දින සහ 02 දින මෙම ගොඩනැඟිල්ලේ තිබූ ශිෂ්‍ය නේවාසිකාගාරයේ, අඳන්, අල්මාරි, ඇතුළු සෞන්දර්ය උපකරණ සියල්ල ඉවත් කරනු ලැබිණි.
දිවයින