රටට ආදරයක් තිබේනම් යෝජිත නව ආණ්‌ඩුක්‍රම ව්යවස්ථාවට විරුද්ධව ඡන්දය ප්‍රකාශ කරන ලෙසට ශ්‍රී ලංකා නිදහස් පක්‍ෂ මන්ත්‍රීවරුන්ගෙන් ඉල්ලා සිටින බව ඇල්ලේ ගුණවංශ හිමියෝ පැවැසූහ.
‘ලංකාව ඔරුමිත්තනාඩුවක්‌ නොකරනු – බෙදුම්වාදී ව්‍යවස්‌ථා එපා’ යන තේමාව යටතේ තුම්මුල්ල සම්බුද්ධත්ව ජයන්ති මන්දිරයේ ඊයේ (27 වැනිදා) සංවිධානය කර තිබූ මාධ්‍ය හමුවකදී උන්වහන්සේ එසේ ප්‍රකාශ කළහ.
රට වෙනුවෙන් කතා කරන චරිත ජාතිවාදීන් ලෙස නම් කර ඇතැයි පැවැසූ උන්වහන්සේ ජාතිවාදී වචනය ගෙනැත් තිබෙන්නේ කාලකන්නි දේශපාලනඥයන් යෑයි ද සඳහන් කළහ.
වරදාන ලබා ගැනීමේ අරමුණින් රට පාවා නොදෙන ලෙසට ශ්‍රී ලංකා නිදහස් පක්‍ෂයේ ඇමැතිවරුන්ගෙන් සහ ගමේ සුවඳ හඳුනන එක්‌සත් ජාතික පක්‍ෂ ඇමැතිවරුන්ගෙන් ඉල්ලා සිටින බව ද ඇල්ලේ ගුණවංශ හිමියෝ පැවැසූහ.
මේ වන විට හිතාගන්න බැරි අන්දමට විශාල මුදල් ප්‍රමාණයක්‌ රට තුළ සංසරණය වන බව ද, මුදලට රට සහ ජාතිය පාවානොදෙන ලෙසට සියලුම දේශපාලනඥයන්ගෙන් ඉල්ලා සිටින බව ද උන්වහන්සේ ප්‍රකාශ කළහ.