නව ආණ්ඩුක්‍රම ව්‍යවස්ථාවක් සම්බන්ධයෙන් මහා නාහිමිවරුන් දරණ මතයට සමාන මතයක ශ්‍රී ලංකා නිදහස් පක්ෂයද සිටින බව නිපුනතා සංවර්ධන හා වෘත්තීය පුහුණු අමාත්‍ය චන්දිම වීරක්කොඩි මහතා පවසයි.
නව ව්‍යවස්ථාවක් සැකසීම සම්බන්ධයෙන් මහානාහිමිවරුන්ගේ උපදෙස් මත පමණක් ශ්‍රීලනිප ය කටයුතු කරන බවද අද, කොළඹ බන්ඩාරණායක සම්මන්ත්‍රණ ශාලාවේ පැවති උත්සවයක් අමතමින් අමාත්‍යවරයා කියා සිටියේය.
මල්වතු – අස්ගිරි මහානාහිමිවරුන්ගේ උපදෙස් මත පසුගියදා රැස්වූ උභය විහාරීය කාරක සංඝ සභාව “නව ව්‍යවස්ථාවක් එපා, සංශෝධනත් එපා“ යැයි ඒකමතිකව තීන්දු කළේය.
ඇමතිවරයාට අනුව ශ්‍රීලනිපයේ මතය ද එයම වනවානම් නව ව්‍යවස්ථාව සම්මත කරගැනීම සදහා එජාපය, ජවිපෙ හා දෙමළ සන්ධානය එකතු වුවද පාර්ලිමේන්තුවේ 2/3 බලය අහිමි වේ.