ගල් අඟුරු ආනයනය කිරීමට වෙන් කර ඇති මුදල් ඉන්ධන ආනයනය කිරීමට යොදා ගැනීමේ සූදානමක් පවතින බැවින් මෙම තත්ත්වය උද්ගත වී ඇත.
ගල් අඟුරු හිඟයක් ඇතිවුවහොත් එමගින් විදුලිය නිෂ්පාදනය කරන බලාගාර අඩපණ වන බැවින් පැය පහළොවකට පමණ කාලයකට විදුලි කප්පාදුවකට යාමට සිදුවන බව මෙම ආරංචි මාර්ග සැක පළ කරයි.
එවැනි විදුලි කප්පාදුවකට යාමට සිදුවුවහොත් එය මෙතෙක් කාලයකට මෙරට සිදුවන දීර්ඝතම විදුලි කප්පාදුව වනු ඇති බවට විදුලිබල මණ්ඩලයේ එම ආරංචි මාර්ග අවධාරණය කර සිටියේය.
අප්‍රේල් මාසය අවසන් වන්නට පෙර ගල් අඟුරු ආනයනය කිරීම ආරම්භ නොකළහොත් අප්‍රේල්වලින් පසුව පැමිණෙන වාරකන් කාලයේ දී කිසිදු ගල් අඟුරු නැවක් මෙරටට ගෙන්වා ගැනීමට අවස්ථාව නොලැබෙනු ඇත.
එබැවින් ඉදිරි සති කිහිපය ඇතුළත අනිවාර්යෙන්ම ගල් අඟුරු ආනයනය කටයුතු ආරම්භ කළ යුතු බවත් එසේ නොවුණහොත් සිදුවන්නේ ජනතාවට දින ගණනාවකටම අඳුරේ සිටීමට බවත් එම ආරංචි මාර්ග වැඩිදුරටත් පෙන්වා දුන්නේය.
- අරුණ –