නවක වදය ලබාදීමේ චෝදනාව මත අත්අඩංගුවට ගත් පේරාදෙණිය විශ්වවිද්‍යාලයේ සිසුන් 15 දෙනා තවදුරටත් රක්ෂිත බන්ධනාගාර ගත කර තිබේ.
ඊයේ දින (02) මහනුවර මහේස්ත්‍රාත් අධිකරණයට ඉදිරිපත් කළ ඔවුන් ලබන 16 වන දින දක්වා රක්ෂිත බන්ධනාගාර ගත කිරීමට මහේස්ත්‍රාත්වරයා නියෝග කර තිබෙනවා.
පේරාදෙණිය විශ්වවිද්‍යාලයේ කෘෂි විද්‍යා පීඨයේ සිසුන් පිරිසකට අමානුෂික ලෙස නවක වදය ලබාදුන් බවට එම විශ්වවිද්‍යාලයේ ජ්‍යේෂ්ඨ සිසුන් 15 දෙනෙකු පසුගිය මස 20 වැනිදා පේරාදෙණිය පොලීසිය විසින් අත්අඩංගුවට ගත් අතර ඔවුන් අද දින දක්වා රක්ෂිත බන්ධනාගාර ගත කර තිබුණි.
ඔවුන් අද අධිකරණයට ඉදිරිපත් කළ අවස්ථාවේ පොලීසිය ඉල්ලීමක් කරමින් සඳහන් කර ඇත්තේ සැකකාර සිසුන්ගේ ජංගම දුරකථනවල නිරුවත් දර්ශන ඇත්ද යන්න පිළිබඳ පරීක්ෂණ පැවැත්වීමට ඒවා අදාළ ආයතන වෙත යැවීමට අවසර ලබාදෙන ලෙසයි.
ඒ අනුව අධිකරණය ඒ සඳහා අවසර ලබාදුන් බවයි අප වාර්තාකරු සඳහන් කලේ.