සයිටම් ආයතනය අහෝසි කිරීම සම්බන්ධයෙන් රජයෙන් මෙතෙක්‌ යහපත් ප්‍රතිචාර නොමැති නිසා රට පුරා රජයේ රෝහල්වල යළිත් අඛණ්‌ඩ වැඩ වර්ජනයක්‌ දියත් කිරීමට රජයේ වෛද්‍ය නිලධාරීන්ගේ සංගමය තීරණය කර ඇත.
මෙම වැඩවර්ජනය සඳහා රාජ්‍ය හා පෞද්ගලික අංශයේ වෘත්තීය සමිති රැසක සහාය ලැබෙන බවද රජයේ වෛද්‍ය නිලධාරීන්ගේ සංගමයේ ලේකම් වෛද්‍ය හරිත අලුත්ගේ මහතා ප්‍රකාශ කළේය.
ඉතා කෙටි දැනුම් දීමක්‌ මත මෙම වැඩ වර්ජනය සිදු කරන බවද වර්ජනය සඳහා දිනය හා වේලාව තීරණය කිරීමේ බලය රජයේ වෛද්‍ය නිලධාරීන්ගේ සංගමයේ මධ්‍යම කාරක සභාව වෙත පැවරූ බවද වෛද්‍ය හරිත අලුත්ගේ මහතා ප්‍රකාශ කළේය.
රජය මේ සම්බන්ධව දක්‌වන ප්‍රතිචාර අනුව අඛණ්‌ඩ වැඩ වර්ජනය ඇතැම් විට අදද හෙටද නැතිනම් ලබන සතියේද යන්න ස්‌ථීරව කිව නොහැකි බවද මාධ්‍ය වෙත ඉතා කෙටි දැනුම් දීමක්‌ සිදු කර වර්ජනය දියත් කරන බවද වෛද්‍ය හරිත අලුත්ගේ මහතා වැඩිදුරටත් ප්‍රකාශ කළේය.