ඊයේ (13දා) පිවිතුරු හෙළ උරුම ප්‍රධාන කාර්යාලයේදී පැවැති මාධ්‍ය සාකච්ඡාවක් අමතමින් පිවිතුරු හෙළ උරුමයේ නායක පාර්ලිමේන්තු මන්ත්‍රී උදය ගම්මන්පිල මහතා නාවික හමුදා බුද්ධි අංශ පිලිබදව විශේෂ හෙළිදරව් කිරීමක් සිදු කරමින් සදහන් කර සිටියේ,
“අත්අඩංගුවට ගන්න රණසිංහ කියන්නේ කවුද? 2001 මැයි 23 කන්තලේ ගංතලාව බෝම්බයකට හසුවුණු නාවික හමුදා කණ්ඩායමේ දහඅටෙන් දහහතක්ම මැරුණා. රණසිංහත් මැරුණා කියලා හිතුවේ. නමුත් දැන් ඔහු 60%ක් ආබාධිතයි. ඔහු ආබාධිත වුණත් රට වෙනුවෙන් සිය යුතුකම් ඉටු කිරීම අත්හැරියේ නෑ. ඊට පසු 51 වතාවක් මරාගෙන මැරෙන ඇඳුම් කට්ටල සහ බෝම්බ සොයා ගෙන තිබෙනවා. නාවික හමුදා ඉතිහාසයේ, ක්ෂේත්‍රයේ දැක්වූ දක්ෂතාවන්ට උසස්වීම් ලැබිලා තියෙන්නේ. නවදෙනෙකුට පමණයි. ඔහු එයින් කෙනෙක්. මේ ආණ්ඩුව විසින් නිදහස් කළ අය අතරේ ත්‍රිකුණාමලයෙ සිට කොළඹට බෝම්බ ලොරියක් පදවාගෙන ආ කොටි ත්‍රස්තයා ඉන්නවා. ඔහුව අත්අඩංගුවට ගත්තේ කොමාන්ඩර් රණසිංහ. ඔහු අපූරු දේශප්‍රේමියෙක්.”
“මේ සතියේ තවත් නාවික හමුදා නිලධාරීන් දෙදෙනකු අත්අඩංගුවට ගන්නා බවට රහස් පොලිසියෙන්ම අපට තොරතුරු ලැබෙනවා. ඒ ලුතිනන් කොමාන්ඩර් ප්‍රසාද් හෙට්ටිආරච්චි සහ කේ. ජී. එන්. ජී. වික්‍රමසූරිය යන අය. රවිරාජ් ඝාතනයටත්, ප්‍රසාද්ව අත්අඩංගුවට ගත්තා. මේ වගේම කරන්නාගොඩ සහ ගෝඨාභයගේ උපදෙස් මත ඝාතනය සිදු කළ බව කියන මෙන් ඔවුන්ට බල කළා. එය නොකළ නිසා වසරකට අධික කාලයක් අත්අඩංගුවේ ඉඳලා අවසානයේදී අධිකරණය විසින් නි‍ෙදාස්කොට නිදහස් කළා”.