කොවිඩ් ආසාදිත වී සුව වූ ළමයින්ට ඇතිවන බහු ඉන්ද්‍රීය ආසාදන රෝගය (Multi system inflammatory syndrome) මෙරට වැඩි වශයෙන් වාර්තා වන බව සෞඛ්‍ය අංශ අවධාරණය කරයි.
කොවිඩ් ආසාදිත වී සති දෙකකට පසුව ඇතැම් ළමයින් මෙම රෝග තත්ත්වයට ගොදුරු වන බව කොළඹ රිජ්වේ ආර්යා ළමා රෝහලේ විශේෂඥ වෛද්‍ය දීපාල් පෙරේරා සඳහන් කළේය.
මේ වනවිට මෙම රෝග තත්ත්වයට ගොදුරු වූ ළමුන් දිවයිනේ බොහෝ රෝහල්වලින් වාර්තා වන අතර දැනට ළමුන් තිස්පහකට වැඩි ප්‍රමාණයක් ඒ සඳහා ප්‍රතිකාර ලබාගෙන ඇත.
උණ ඇතිවීමෙන් මෙම රෝගය හටගන්නා අතර ඇස් රතුවීම, දිව රතුවීම, සමෙහි රතු ලප ඇති වීම, වැනි රෝග ලක්ෂණ පෙන්නුම් කරනු ලබයි. එසේම මෙම රෝගයෙන් මොළයට බලපෑම් ඇති කළ හැකි බවත් අක්මාවට වකුගඩුවලට සහ හෘදය වස්තුවට බලපෑම් එල්ල කළ හැකිය. එය භයානක තත්ත්වයක් බව ද හෙතෙම කියා සිටියේය.
විශේෂඥ වෛද්‍ය දීපාල් පෙරේරා සඳහන් කළේ මෙම රෝග තත්ත්වය ළමුන්ගෙන් හඳුනා ගත්තද මේ වනවිට කොවිඩ් ආසාදිත වී සුව වූ වැඩිහිටියන්ගෙන් ද මෙම රෝගය වාර්තා වන බවය.