රජයේ විධායක නිලධාරීන්ගේ ඒකාබද්ධ කමිටුවට අයත් දීපව්‍යාප්ත හා සමාන්තර සේවාවල වෘත්තිය සමිති රැසක් අද සංකේත වැඩවර්ජනයක නිරත වේ.
ඒ වැටුප් ප්‍රතිපත්තිය උල්ලංඝෙණය කරමින් තෝරාගත් සේවාවන් කිහිපයක් සඳහා පමණක් වැටුප් හා දීමනා ලබාදීම, උසස්වීම් ක්‍රමවේදයේ විෂමතා ඇතුළු ගැටලු කිහිපයකට වහා විසඳුම් ලබා දෙන්නැයි, බල කරමිනි.
රාජ්‍ය සේවා ඉංජිනේරු සංගමය , රජයේ ආයුර්වේද වෛද්‍ය නිලධාරීන්ගේ සංගමය , දේශීය ආදායම් වෘත්තිය සංගම් එකමුතුව , කම්කරු කොමසාරිස්වරුන්ගේ සංගමය සහ අධ්‍යාපන පරිපාලන සේවා වෘත්තිය සංගම් එකමුතුව ඇතුළු වෘත්තිය සමිති 17 ක් මෙම වැඩවර්ජනයට එක්ව සිටී.
මේ අතර අද උදෑසන 10 ට කොටුව දුම්රියපළ ඉදිරිපිට විරෝධතාවයක ද නිරත වන බව රජයේ විධායක නිලධාරීන්ගේ ඒකාබද්ධ කමිටුව අවධාරණය කරයි.