පුනරුත්තාපනය වූ කොටි සාමාජිකයින් හට සිවිල් ආරක්ෂක දෙපාර්තමේන්තුවේ හෝ වෙනත් රාජ්‍ය ආයතනයක රැකියා අවස්ථා ලබාදෙන ලෙස ඉල්ලා ඊයේ (2) කිලිනොච්චිය ඉරණමඩු පිහිට සිවිල් ආරක්ෂක කඳවුර ඉදිරිපිට පුනරුත්ථාපනය වූ කොටි සාමාජිකයින් පිරිසක් විරෝධතාවක නිරත වූහ.
රජය විසින් තමන් අත්අඩංගුවටගෙන පුනරුත්ථාපනය කොට සමාජගත කොට වසර ගණනක් ගෙවී ගොස් ඇති බවත් තවමත් පුනරුත්ථාපනය ලැබූ සාමාජිකය හට ස්ථීර රැකියාවක් ලබාදී නොමැති බවත් පැවසීය.
තමන් හට ජීවත්වීම සඳහා ස්වයං රැකියා හෝ කුමණ හෝ රැකියාවක් ලබාදීමට පුනරුත්ථාපනය වූ කාලසීමාව තුළ විවිධ නිලධාරීන් පැමිණ ප‍්‍රතිඥා දුන්නද මේ වනවිට තමන්ට ග‍්‍රාම නිලධාරී සහතික පතක් හෝ ලබාගැනීම අපහසුවී ඇතැයි ද කියති.
රාජ්‍ය හෝ රාජ්‍ය නොවන බැංකු තමන්ට ණය දීම ද ප‍්‍රතික්ෂේප කොට ඇති බවත් ආබාධිතයින් වෙනුවෙන් ලබාදෙන දීමනාවද රජය විසින් කපාහැර දමා ඇතැයිද විරෝධතාකාරුවෝ චෝදනා කළහ.