2020 වසරේ මහමැතිවරණය වනවිට විදෙස්ගත ශ්‍රී ලාංකික ශ්‍රමිකයන්ටත්, ජනමාධ්‍ය, සෞඛ්‍ය සේවා ඇතුළු අත්‍යාවශ්‍ය සහ හදිසි සේවාවල නිරත පිරිසටත් තම සේවා ස්ථානවල සිටම ඡන්දය ප්‍රකාශ කිරීමට ඉඩ ලැබෙන වැඩපිළිවෙලක් සකස් කරන බව මැතිවරණ කොමිසන් සභාවේ සභාපති මහින්ද දේශප්‍රිය මහතා ප්‍රකාශ කරයි.
සභාපතිවරයා මේ බව පැවසුවේ පසුගියදා මැතිවරණ කොමිසන් සභා ශ්‍රවණාගාරයේ පැවති මාධ්‍ය හමුවකදීය.
මැතිවරණ දිනයේදී විශේෂ රාජකාරිවල යෙදී සිටින පිරිසට එක් පොදු ස්ථානයකදී ඡන්දය දීමටත් සියලු දෙනාටම සහන සැලසෙන වැඩපිළිවෙලක් කෙරෙහිත් අවධානය යොමුකර ඇතැයි සභාපතිවරයා එහිදී පැවසීය.
විදෙස්ගත ශ්‍රී ලාංකිකයන්ගේ සංඛ්‍යාව ලක්ෂ 15කට වඩා වැඩි බවත් ඔවුන්ට ඡන්දය දීම සඳහා අවස්ථාවක් උදාකරදීම සම්බන්ධයෙන් සංවාදයක් ඇතිවියයුතු බවත් කී දේශප්‍රිය මහකා විදෙස්ගත ශ්‍රමිකයින්ගේ නම් ඡන්ද නාම ලේඛණයට ඇතුළත් කිරීමට නිවැසියන් කටයුතු කිරීමේ වැදගත්කම ද පෙන්වා දුන්නේය.
එමෙන්ම ආදිවාසීන්, ස්ථිර පදිංචියක් හෝ ලිපිනයක් නොමැති පුද්ගලයින්ට ද මැතිවරණ පද්ධතියට ඇතුළත් කර ගැනීමට අවශ්‍යය කටයුතු සකසමින් සිටින බව ද දේශප්‍රිය මහතා වැඩිදුරටත් සඳහන් කර සිටියේය.