ප්‍රගීත් එක්නැලිගොඩ මරා දැම්ම බවට හෝ මැරුණු බවට කිසිදු සාක්‍ෂියක්‌ නොමැතිව දණ්‌ඩ නීති සංග්‍රහයේ 296 වගන්තිය යටතේ විත්තිකරුවන්ට එරෙහිව කටයුතු කරන්නේ කෙසේ දැයි හෝමාගම මහෙස්‌ත්‍රාත් රංග ප්‍රභාත් අබේසිංහ මහතා මෙසේ විමසා සිටියේ යුද හමුදා සන්නද්ධ බුද්ධි බළකායේ නිලධාරීන් හයදෙනකුට එරෙහිව චෝදනා ගොනු කර තිබෙන ප්‍රගීත් එක්නැලිගොඩ නඩුව ඊයේ (25 දා) විභාගයට ගත් අවස්‌ථාවේදීය.
මෙහිදී ප්‍රගීත් එක්නැලිගොඩ අතුරුදන් වූ බව කියන ඉකුත් 2009 වසරේ ජනවාරි 24 දින සිට ඒ පිළිබඳ සිදු කෙරුණු විමර්ශන අඩාළ වූ ආකාරය සහ වත්මන් රහස් පොලිස් විමර්ශනයට අනුව කරුණු හෙළිවූ අන්දම පිළිබඳ දීර්ඝ විස්‌තරයක්‌ අධිකරණයට ඉදිරිපත් කළ රජයේ ජ්‍යෙෂ්ඨ අධිනීතිඥ දිලීප පීරිස්‌ මහතා ප්‍රගීත් එක්නැලිගොඩ අවසන් වරට ගිරිතලේ හමුදා කඳවුරේ රඳවා සිටි බව අනාවරණය වී තිබෙන බව සඳහන් කළේය.
රජයේ හමුදා කඳවුරක සිටි ඔහු මරා දමන්නට ඇතැයි උපකල්පනය මත සැකකරුවන්ට එරෙහිව කරුණු වාර්තා කළ බවද සඳහන් කළ දිලීප පීරිස්‌ මහතා ප්‍රගීත් එක්නැලිගොඩ මැරුවාද අතුරුදන් කළේ ද යන්න නිශ්චිතව පැවසිය නොහැකි බවද පැවසීය.
යම් පුද්ගලයකු මියගිය බව නිශ්චිතව තහවුරු වීමක්‌ නොමැතිව 296 වගන්තිය යටතේ කරුණු ඉදිරිපත් කිරීමට නීතියේ ඉඩක්‌ තිබේ දැයි මහෙස්‌ත්‍රාත්වරයා මෙහිදී නැවතත් විමසා සිටියේය.
දිවයින