ගාල්ල බන්ධනාගාරයේ නියාමකවරයෙකුට පහර දී බිය ගැන්වූ බව කියන සිද්ධියට අදාළව සැකකරුවන් තිදෙනෙකු මනුෂ්‍ය ඝාතන හා සංවිධානාත්මක අපරාධ විමර්ශන කොට්ඨාශය විසින් අත්අඩංගුවට ගෙන තිබේ.
අදාළ සිද්ධිය වාර්තා වූයේ පසුගිය 05වන දිනයි.
සේවය නිමකර නිවස වෙත යමින් සිටියදී එම නිලධාරියාට පිරිසක් පැමිණ වැලිගම ප්‍රදේශයේ දී පහර දී තිබුණි.
සිද්ධිය සම්බන්ධයෙන් පොලිසිය දිගින් දිගටම විමර්ශන සිදු කළ අතර ඒ අනුව මෙම සැකකරුවන් පිරිස අත්අඩංගුවට ගෙන ඇත.
ඔවුන් අදාළ පහර දීම සිදු කිරීම සඳහා පැමිණි බව කියන යතුරු පැදියක් සහ ත්‍රිරෝද රථයක් ද මෙහිදී පොලිස් භාරයට ගෙන තිබේ.
සැකකරුවන් වයස අවුරුදු 19, 23 සහ 30 යන වයස්වල පසුවන වැලිගම සහ දික්කුඹුර යන ප්‍රදේශවල පදිංචිකරුවන්ය.
මනුෂ්‍ය ඝාතන හා සංවිධානාත්මක අපරාධ විමර්ශන කොට්ඨාශය විසින් වැඩි දුර විමර්ශන සිදු කරනු ලබයි.