ඇමති විජේදාස රාජපක්ෂ මහතා අධිකරණ අමාත්‍ය ධුරයෙන් නෙරපීමට එක්සත් ජාතික පක්ෂයේ මන්ත්‍රීවරු පිරිසක් ගන්නා උත්සාහයට ජනාධිපති මෛත්‍රීපාල සිරිසේන මතාගේ විරෝධය එල්ල වී තිබෙන බව ආණ්ඩුවේ අභ්‍යන්තර තොරතුරු මාර්ග අනාවරණය කරනවා.
ඇමති විජේදාස රාජපක්ෂ ධුරයෙන් නෙරපීමට එජාපය විසින් ගන්නා උත්සාහය හෙළා දකිමින් අස්ගිරි, මල්වතු, රාමාඤ්ඤ මහා නිකායවලින්ද ප්‍රකාශ නිකුත් කර තිබුණ අතර, ජනාධිපතිවරයාගේ මෙම තීරණයට එයද ප්‍රබල සෙල බලපා තිබෙන බවද සදහන් වේ.
කෙසේ වෙතත් අධිකරණ ඇමතිවරයා කෙරෙහි විශ්වාසය කඩ වී ඇති බවට 17 බ්‍රහස්පතින්දා පැවති එජාප කෘත්‍යාධිකාරි මණ්ඩලයට ඉදිරිපත් කළ යෝජනාව ඒකමතිකව සම්මත වී තිබෙන අතර, අමාත්‍යවරයාට එරෙහිව පාර්ලිමේන්තුවට ගෙන ඒමට යෝජනතා වූ විශ්වාශභංගය ගැන එහිදි කිසිදු තීරණයක් ගෙන නොමැති බවද පැවසේ.
විජේදාස රාජපක්ෂ ඇමතිවරයාට එරෙහිව විශ්වාසභංගයක් ගෙන ආවොත් ඒකාබද්ධ විපක්ෂය සහ ශ්‍රීලනිප පාර්ශවය මෙන්ම එජාපයේ පිරිසක්ද ඇමතිවරයා වෙනුවෙන් පෙනී සිටීමේ වැඩි ඉඩකඩක් පවතින බැවින් එයට පාර්ලිමේන්තුවේ බහුතරය ලබාගත නොහැකි වනු ඇති යැයිද කතාබහට ලක්වී තිබේ.