ශ්‍රී ලංකාව සහ තායිලන්තය අතර යෝජිත නිදහස් වෙළෙඳ ගිවිසුමට අදාළ තුන්වැනි වටයේ සාකච්ඡා අද(09)දින කොළඹදී ආරම්භ වෙයි.
එහිදී භාණ්ඩ වෙළඳාම, සේවා වෙළඳාම, ආයෝජන සහ ආර්ථික සහයෝගීතාව යන ක්ෂේත්‍ර පිළිබඳව විශේෂ අවධානයක් යොමු කරන බවයි ජනාධිපති මාධ්‍ය අංශය පවසයි.
ඒ සඳහා සහභාගිවීමට තායිලන්ත රජයේ නියෝජිත කණ්ඩායමක් ඊයේ(8)දින දිවයිනට පැමිණියේ ය.
තායිලන්ත වෙළෙඳ සාකච්ඡා දෙපාර්තමේන්තුවේ අධ්‍යක්ෂ ජනරාල් අවුරමන් සුප්තාවිතුම් මහත්මියගේ ප්‍රධානත්වයෙන් යුත් කණ්ඩායමට නියෝජිතයන් 26 දෙනෙකු ඇතුළත් ය.
සාකච්ඡාවට ජනාධිපති කාර්යාලය යටතේ ක්‍රියාත්මක වන ජාතික වෙළෙඳ සාකච්ඡා කමිටුවේ සාමාජිකයින් ද සහභාගී වෙයි.
ඊට අමතරව විදේශ කටයුතු අමාත්‍යාංශය, වෙළඳ හා ආහාර සුරක්ෂිතතා අමාත්‍යාංශය, මුදල් අමාත්‍යාංශයේ වෙළෙඳ හා ආයෝජන කටයුතු දෙපාර්තමේන්තුව හා වාණිජ දෙපාර්තමේන්තුව යන ආයතනවල නියෝජිතයන් ද ඊට ඇතුළත් ය.
ශ්‍රී ලංකා – තායිලන්ත නිදහස් වෙළඳ ගිවිසුම 2024 පළමු කාර්තුවේදී ක්‍රියාත්මක කිරීම, රජයේ අපේක්ෂාවයි.