බිරිඳගේ 12 හැවිරිදි නැගණිය ගැබිනියක කළ සැමියෙකුට වසර 39ක බරපතළ වැඩ සහිත සිර දඬුවමක්, රුපියල් 30,000ක දඩයක් හා රුපියල් ලක්ෂ දෙක හමාරක වන්දියක් ගෙවන ලෙස හම්බන්තොට මහාධිකරණ විනිසුරු නියෝග කළේ ය.
මෙලෙස සිර දඬුවම් නියම වූයේ, තිස්සමහාරාම පොලිස් බල ප්‍රදේශයේ පදිංචි 36 හැවිරිදි දෙදරු පියෙකුට ය.
චූදිතයාගේ බිරිඳ මීට වසර 14කට පෙර එනම්, 2009 වසරේ අගෝස්තු මස 1 වන දින ඇති වූ හදිසි රෝගි තත්ත්වයක් හේතුවෙන් නේවාසික ප්‍රතිකාර සඳහා හම්බන්තොට මහ රෝහලට ඇතුළත් කර තිබේ.
එම අවස්ථාවේ ඇගේ වයස අවුරුදු දෙක හමාරක දරුවා රැක බලාගෙන ඇත්තේ, 12 හැවිරිදි ඇගේ නැගණිය යි.
බිරිඳ රෝහල්ගත කර දිනයේ සිට අදාළ පුද්ගලයා විසින් බිරිඳගේ නැගණිය අවස්ථා කිහිපයකදී ම බරපතළ ලිංගික අපයෝජනයට ලක් කරනු ලැබ ඇත.
පසුව සිද්ධිය පිළිබඳව තිස්සමහාරාම පොලිසියට ලැබුණු පැමිණිල්ලකට අනුව විමර්ශන කටයුතු ආරම්භ කර සැකකරු අත්අඩංගුවට ගෙන තිස්සමහාරාම මහේස්ත්‍රාත් අධිකරණයට ඉදිරිපත් කිරිමෙන් පසු රක්ෂිත බන්ධනාගාරගත කර කර තිබිණි.
පසුව ඔහුට එරෙහිව පැවති මූලික නඩු විභාගයෙන් අනතුරුව නිතිපතිවරයා විසින් 2013.02.15 දින හම්බන්තොට මහාධිකරණය හමුවේ අධිචෝදනා 3ක් යටතේ නඩු පවරන ලදී.
ඒ අනුව, ඊයේ (18) සවස නඩුව විභාගයට ගත් මුල් අවස්ථාවේදී ම සැකකරු අදාළ චෝදනාව සඳහා වරද පිළිගෙන තිබේ.
ඉදිරිපත් වූ කරුණු සලකා බැලූ හම්බන්තොට මහාධිකරණ විනිසුරුවරයා සැකකරුට එක් චෝදනාවකට වසර 13 බැගින් චෝදනා 3 සඳහා වසර 39ක බරපතළ වැඩ සහිත සිර දඬුවමක් නියම කර ඇත.