පෝර්ට් සිටි ආයෝජන ව්‍යාපෘතිය පසුගිය දා ඩුබායි හි පැවති උත්සවයක දී කොළඹ මූල්‍ය නගරය ( Colombo Financial City ) ලෙස යළිත් නම් කිරීමෙන් පසු, එහි ආයෝජනය කිරීම සදහා ප්‍රථම ආයෝජකයා ලෙස චීන ජාතික සමාගමක ආයෝජකයෝ සිව් දෙනෙක් කටුනායක ගුවන් තොටුපොළ වෙත ඊයේ (02)රාත්‍රියේ මෙරටට පැමිණ තිබේ.
චීනයේ බෙහිජිං හි අර්ධ රාජ්‍ය සමාගමක් වන සී.ඉසෙඩ්.කේ.හුවාරුයි කල්චරල් ඇන්ඩ් ආර්ට් සමාගම නියෝජනය කරමින් එම සමාගමේ සාමාන්‍යාධිකාරි ඇතුළු තවත් තිදෙනෙක් මෙලෙස දිවයිනට පැමිණ තිබේ.
ඔවුන් අමෙරිකානු ඩොලර් මිලියන 50ක මුදලක් ආයෝජනය කරමින් මෙම පෝර්ට් සිටි ව්‍යාපෘතිය තුළ මැණික් කෞතුකාගාරයක්, මැණික් පරීක්ෂා කෙරෙන රසායනාගාරයක් සහ වෙන්දේසි මධ්‍යස්ථානයක් පිහිටුවීමට සැළසුම් කර ඇති බව වාර්තා වේ.
මීට අමතරව මෙම ආයෝජකයින් පිරිස ශ්‍රී ලංකා ආයෝජන මණ්ඩලය යටතේ අමෙරිකානු ඩොලර් මිලියන 150ක ආයෝජනයක් ලෙස විද්‍යුත් වාහන එකලස් කිරීමේ කර්මාන්තශලාවක් ආරම්භ කිරීමට ද නියමිතය.