දරුවන්ගේ ඔන්ලයින් අධ්‍යාපන කටයුතුවලට සහභාගී නොවී දැනට ආරම්භ කර ඇති වෘත්තීය සමිති ක්‍රියාමාර්ගය අඛණ්ඩව සිදු කිරීමට ගුරු වෘත්තීය සමිති තීරණය කර තිබේ.
සිය ඉල්ලීම් රැගෙන ඔවුන් අද විරෝධතා පාගමනක නිරත වුණේ කොළඹ කොටුවේදීයි. පසුව ඔවුන් ජනාධිපති ලේකම් කාර්යාලය දක්වා පැමිණියේ උද්ඝෝෂණ සහ මහජන ඒකරාශීවීම් සිදු නොකළ යුතු බවට සෞඛ්‍ය නිර්දේශ පවා නිකුත් කර ඇති පසුබිමකය.
පසුව විරෝධතා පාගමනින් පැමිණි තිදෙනෙකුට සාකච්ඡාවක් සඳහා ජනාධිපති කාර්යාලයට ඇතුළුවීමට අවසර හිමිවිය. ඊට සහභාගී වූ ලංකා ගුරු සංගමයේ ලේකම් ජෝසප් ස්ටාලින් පසුව මාධ්‍ය වෙත අදහස් පළ කළේය.
පළමුව නිරෝධායන රෙගුලාසි වලටත්, පසුව වැටුප් විෂමතා ඇතුළු ඉල්ලීම් කිහිපයක් මුල්කර ගනිමිනුත් ගුරු සංගම් ආරම්භ කළ වෘත්තීය සමිති ක්‍රියාමාර්ගය හේතුවෙන් දින 10 කට අධික කාලයක් රට පුරා දරුවන්ගේ ඔන්ලයින් අධ්‍යාපනය බිඳ වැටී තිබේ.