අත්අඩංගුවේ සිටියදී පැන යෑමට තැත්තළ කොටි ත්‍රස්ත සැකකරුවෙකුට වෙඩි තබා මරා දැමුවේ යන චෝදනාව මත දස වසරක අත් හිටවූ සිරඩුවමක් සහ, අදාළ කොටි සැකකරුගේ පවුලට ලක්ෂ 20ක වන්දියක් ගෙවීමට අධිකරණයෙන් නියමව සිටින මේජර් විමල් වික්‍රමගේ මහතාට එම මුදල සපයා ගැනීම සදහා මුදල් එකතු කිරීමේ ව්‍යාපාරයක් “රණවිරුවන් සුරැකීමේ ජාතික ව්‍යාපාරය“ විසින් ආරම්භකර තිබෙනවා.
එම කටයුත්ත විවේචනය කරමින් අමාත්‍ය හරීන් ප්‍රනාන්දු මාධ්‍ය සාකච්චාවකදී පවසා තිබුණේ, පසුගිය රජයේ හොරා කෑ අමාත්‍යවරුන් පිරිසක් රණවිරුවන් විකුණාගෙන කෑම සදහා කැට හෙල්ලීමේ ව්‍යාපාරයක් ආරම්භ කර ඇති බවයි.
එම ප්‍රකාශයට පූජ්‍ය බෙංගමුවේ නාලක හිමියන් ප්‍රතිචාර දක්වා තිබෙනවා.
රණවිරු අරමුදලට මුදල් එකතු කිරීම සදහා ඊයේ පැවති වැඩසටහනකදී අදහස් දැක්වූ පූජ්‍ය බෙංගමුවේ නාලක හිමියන් සඳහන් කළේ “අපි මේ කැට හොල්ලන්නෙ හම්බ කරගත්තෙ නැති නිසා. රණවිරුවන් වෙනුවෙන් වන්දි මුදල් ගෙවන්න.. ඇප මුදල් ගෙවන්න.. තමයි මේ දේවල් කරන්නෙ. කවුරු ඒවට නින්දා අපහාස කරත් මිනිස්සු ඒක අගය කරනවා. හරීන් ප්‍රනාන්දු වගේ මොට්ට මිනිස්සු මොනවා කිව්වත් අපේ වැඩේ අපි නතර කරන්නෙ නැහැ.” යනුවෙනි.
මේ අතර ප්‍රගීත් එක්නැලිගොඩ අතුරුදන් කිරීමේ සිද්ධියට වසරකට ආසන්න කාලයක් රක්ෂිත බන්ධනාගාර ගත කර සිටි යුද හමුදා සන්නද්ධ බුද්ධි බළකායේ නිලධාරීන් හතදෙනෙකුට අවිස්සාවේල්ල අධිකරණය මගින් ඇප ලබා දුන් අතර, නියමිත ඇප මුදල ගෙවා ගැනීමට නොහැකි වීම නිසා එම නිලධාරීන් සිවු දෙනා නැවතත් බන්ධනාගාරගත කර තිබෙනවා.
එම නිළධාරීන්ට ඇප මුදල් එකතු කරදීම සදහා මුදල් එකතු කිරීමේ ව්‍යාපාරයක් ඊයේ රාජගිරියේදී සංවිධානය කර තිබිණි.
