මේ වන විට ආණ්ඩු පක්ෂයට පාර්ලිමේන්තු බහුතරය ගැනීමට අසීරු තත්ත්වයක් නිර්මාණය වී ඇතැයි ශ්‍රී ලංකා පොදුජන පෙරමුණේ මහ ලේකම් සාගර කාරියවසම් පවසයි.
එහෙයින් පසුගිය සමයේ කොටි ත්‍රස්තවාදීන් සමග එකතු වී බෙදුම්වාදය දියත් කළ කණ්ඩායම් මුදල් වියදම් කර ජනප්‍රිය පුද්ගලයන් යොදාගෙන දේශපාලන පක්ෂ නිර්මාණය කර එම බහුතරය සකසා ගැනීමට කටයුතු කරන්නේ දැයි සැකයක් උපදින බව ඔහු සඳහන් කරයි.
ජාතික ජන බලවේග ප්‍රතිපත්ති ප්‍රකාශනයෙහි 2015 සමයේ ගෙන ආ ඔරුමිත්තනාඩු ව්‍යවස්ථා යෝජනාවලින් හැකි ඉක්මනින් සම්පූර්ණ කිරීමට යෝජනා කර ඇති බවත් අගමැතිනි හරිනි අමරසූරිය ද සාමාජිකත්වය දැරූ එම ව්‍යවස්ථා යෝජනාවලිය මගින් මෙරට ජාතික ධජය වෙනස් කිරීම, මෙරට අනාගමික රාජ්‍යයක් කිරීම සහ ඒකීයභාවය අහෝසි කරමින් ෆෙඩරල් රාජ්‍යයක් නිර්මාණය කිරීමට යෝජනා කර ඇති බවත් සාගර කාරියවසම් පෙන්වා දෙයි.
මෙම කරුණු සැලකිල්ලට ගෙන මහා මැතිවරණයට පෙර මේ රට ෆෙඩරල්කරණය සඳහා ඉඩ ලබා නොදෙන බවට ජනාධිපතිවරයා ප්‍රකාශයක් කළ යුතු බව ඔහු අවධාරණය කරයි.