වෙනත් දේශපාලන බලවේග හෝ දේශපාලන පක්‍ෂ සාදාගෙන පක්‍ෂය භේද භින්න කරන සියලු දෙනා තරාතිරම නොබලා ශ්‍රීලනිපයෙන් නෙරපා හැරීමට 30 දා රැස්‌වූ පක්‍ෂ මධ්‍යම කාරක සභාව තීරණය කළ බව එජනිස මහ ලේකම් මහින්ද අමරවීර මහතා පවසයි.
ශ්‍රීලනිප නායකයා මෙන්ම සභාපතිවරයා ද වන ජනාධිපති මෛත්‍රිපාල සිරිසේන මහතාගේ ප්‍රධානත්වයෙන් පක්‍ෂයේ කෘත්‍යාධිකාරි මණ්‌ඩලය 30 දා රාත්‍රියේ රැස්‌වූ බව ද හෙතෙම කීවේය.
වෙනම පක්‍ෂ හෝ බලවේග සාදා ගැනීමෙන් සිදුවන්නේ ශ්‍රිලනිපය භේද භින්න වීම බව ද ඒ හරහා මීළඟ මැතිවරණවලින් පක්‍ෂය පරාජයට පත් කරවීමට පිරිසක්‌ උත්සාහ කරන බව ද මහින්ද අමරවීර මහතා ප්‍රකාශ කළේය.
විවිධ පිරිස්‌ තැන් තැන්වල ප්‍රකාශ කරමින් අලුත් බලවේග සහ පක්‍ෂ සාදන බවට ප්‍රචාරය කරමින් සිටින බව කී හෙතෙම මොවුන් උත්සාහ කරන්නේ ශ්‍රීලනිපය දෙකඩ කිරීමට බව ද කීය.
එම නිසා මෙම කුමන්ත්‍රණකාරීන් කුමන තරාතිරමක අය වුවත් ශ්‍රීලනිපයෙන් නෙරපා හැරීමට කෘත්‍යාධිකාරි මණ්‌ඩලය තීරණය කළ බව කී මහින්ද අමරවීර මහතා පක්‍ෂයට ආදරය ඇති ඕනෑම කෙනකුට මෛත්‍රිපාල සිරිසේන ජනාධිපතිවරයාගේ නායකත්වය යටතේ එක්‌ව පක්‍ෂය ශක්‌තිමත් කිරීමේ කටයුත්තට දායක විය හැකි බව ද කීවේය.
– දිවයින