ශ්‍රී ලංකා වරාය අධිකාරියේ රැකියා ලබාදෙන පවසමින් මූල්‍ය වංචා සිදුකිරීමේ චෝදනාවක් සම්බන්ධයෙන් හිටපු පොලිස් කොස්තාපල්වරයෙකු වත්තල ප්‍රදේශයේ දී අත්අඩංගුවට ගෙන තිබේ.
අත්අඩංගුවට ගත් සැකකරු වරාය අධිකාරියේ සභාපතිවරයාගේ පෞද්ගලික ආරක්ෂක නිලධාරියා බව පවසා විවිධ පුද්ගලයින් රවටා මුදල් වංචා කර ඇති බව පොලීසිය පැවසුවේය.
මේ සම්බන්ධයෙන් ඉදිරිපත් වූ පැමිණිලිවලට අදාළ විමර්ශනවලින් අනතුරුව කොළඹ වරාය පොලීසිය මඟින් සැකකරු අත්අඩංගුවට ගෙන තිබේ.
ඔහු පොලිස් මූලස්ථානයට අනුයුක්තව සේවය කර සිටියදී පසුගිය 2018 වසරේදී වැඩ තහනමට ලක්වූ පොලිස් කොස්තාපල්වරයෙකු බව සඳහන් වේ.
සැකකරු කදාන පොලීසියට භාර දී ඇති අතර ඔහු අද (19)දින වැලිසර මහෙස්ත්‍රාත් අධිකරණයට ඉදිරිපත් කිරීමට නියමිතය.