ඉන්දියාව සමගින් ලබන 18 වැනිදා සිට ආරම්භ වීමට නියමිත එක්දින සහ විස්සයි විස්ස ක්‍රිකට් තරගාවලිය සඳහා ශ්රී ලංකා ක්‍රිකට් කණ්ඩායම ඊයේ (12)දින කණ්ඩායම් වශයෙන් සිය පුහුණුවීම් ආරම්භ කරනු ලැබීය.
පිතිකරණ පුහුණුකරු ග‍්‍රාන්ට් ෆ්ලවර්ට සහ දත්ත විශ්ලේෂක ජී.ටී. නිරෝෂන්ට කොවිඩ් වෛරසය අසාදනය වීමත් සමගින් සෙසු පුහුණුකරුවන් නිරෝධායනයට යොමුකර තිබීම හේතුවෙන් අදාළ පුහුණු සැසි හිටපු දඟ පන්දු යැවීමේ පුහුණුකරු පියල් විජේතුංග විසින් සිදුකර තිබුණි.
අවසන්වරට සහභාගි වූ එක්දින තරග 9න් 7ක් පරාජයට පත් වී සිටින ශ්රී ලංකා කණ්ඩායමට 2023 එක් දින ලෝක කුසලාන ක්‍රිකට් තරගාවලියට එක එල්ලයේ සහභාගි වීමට නම් මෙම තරගාවලි ජයග‍්‍රහණය බෙහෙවින් වැදගත් වනු ඇත. එනිසා කණ්ඩායමේ පුහුණුකරුවන් නිරෝධායනයෙන් මිදෙන තෙක් පියල් විජේතුංගට අමතරව තවත් තාවකාලික පුහුණුකරුවන් කිහිපදෙනකු හෝ ජාතික කණ්ඩායමට යොදවන්නේනම් එය උචිත වන බව ක්ෂේත‍්‍රයේ කතාබහට ලක්වී ඇත.
එක්දින සංචිතය ඊයේ (12)දින කණ්ඩායම් තුනකට බෙදී පුහුණුවීම්වල නිරත වූ අතර ඒ අයුරින්ම ඔවුන් අදත් පුහුණුවීම්වල නිරත වීමට නියමිතය. ලබන 17 වැනිදා දක්වා එක්දින සංචිතයේ පුහුණුවීම් පැවැත්වෙනු ඇත.