මහරගම නගරසභාව යටතේ ධාවනය වන වාහනවලට දෛනිකව ලබා දෙන ඉන්ධනවලට භූමිතෙල් මිශ්‍ර කර ලබාදීමේ වංචාවක් පිළිබඳව වාර්තා වී ඇතැයි මහරගම නාගරික මන්ත්‍රී සුරේෂ් නිශාන්ත මහතා පැවසීය.
අනාවරණය වී ඇත්තේ නගර සභාවට අයත් වාහනයක වූ කාර්මික දෝෂයක් යථා තත්වයට පත්කිරීමට ගිය අවස්ථාවේදී බව ඔහු පවසයි.
ඔහු වැඩි දුරටත් සඳහන් කරන්නේ ලංකා ඛනිජ තෙල් සංස්ථාව මගින් නගර සභාවේ දෛනික අවශ්‍යතා සඳහා ඩීසල් ලබාදෙන අතර එලෙස රැගෙන එන ඩීසල් සහිත බවුසර්වලට භූමිතෙල් මිශ්‍රවී ඇති බවට අනාවරණය වී තිබෙන බවකි. එසේම මේ තත්වය දිගට පැවතුනහොත් නගර සභාවට අයත් වාහනවල නඩත්තුව පිළිබඳව ඉදිරියේ දී ගැටලු රැසක් මතු විය හැකි බවද ඒ මහතා සඳහන් කරයි.
පරීක්ෂණයක් පවත්වා සත්‍ය තත්ත්වය පැහැදිලි කරන ලෙස නාගරික මන්ත්‍රී සුරේෂ් නිශාන්ත මන්ත්‍රීවරයා වැඩිදුරටත් සඳහන් කරයි.