නෝර්වේ විදේශ අමාත්‍ය බෝග් බ්‍රෙන්ඩේ අද (07)ශ්‍රී ලංකාවට පැමිණියා.
ඔහු සමග 7 දෙනෙකුගෙන් යුතු විශේෂ ධූත පිරිසක් පැමිණ තිබේ. ශ්‍රී ලංකාව සමග බිද වැටුණු දේශපාලන සබදතා යළි ඇතිකර ගැනීම මෙම සංචාරයේ අරමුණ බවයි නෝර්වේ විදේශ අමාත්‍ය වරයා සදහන් කර ඇත්තේ. ශී‍්‍ර ලංකාවේ මෑතදී සිදුවූ දේශපාලන වෙනස්කම් ඊට පසුබිම සකස් කර ඇතැයිද ප‍්‍රකාශ කෙරුණා.
ශ්‍රී ලංකා රජය සහ කොටි සංවිධානය අතර පැවති සාම සාකච්ඡාවල මැදිහත්කරුවා ලෙස කලක් කටයුතු කළේ නෝර්වේ රාජ්‍යයි. සාම ක්‍රියාවලියේ දී නෝර්වේ මැදිහත්වීම දැඩි ප්‍රශ්නකාරී එකක් වූ අතර ඒ පිළිබදව විවේචනද එල්ල වුණා. 2006 වසරෙන් පසු නෝර්වේ අමාත්‍යවරයෙකු ශී‍්‍ර ලංකාවට පැමිණෙන පළමු අවස්ථාවද මෙයයි.