අයවැයෙහි හෝ ඕනෑම දෙයක ඇති ගැටළු සහගත කරුණු රටේ ප‍්‍රධානීන් සමග සාකච්ඡා කර වෙනස් කිරීමට අවශ්‍ය ප‍්‍රජාතන්ත‍්‍රවාදී පසුබිම මේ වන විට රට තුළ ඇතිවී ඇතැයි සමාජ සවිබලගැන්වීම් සහ සුබසාධන අමාත්‍ය එස්.බී දිසානායක මහතා රජයේ ප‍්‍රවෘත්ති දෙපාර්තමේන්තුවේ දී අද (29) පැවසීය.
පසුගිය කාලයේ එවන් පසුබිමක් නොතිබූ බව කී ඇමැතිවරයා 18 වැනි සංශෝධනය ආදී දේට ඇතැම් මැති ඇමතිවරුන් විරුද්ධ වුවත් ඒ සම්බන්ධයෙන් හඬක් නැගීම පළක් නොවන බව දැන සිටි නිසා ඔවුන් කිසිත් නොකී බවද ඇමැතිවරයා කීවේය.
ශ්‍රී ලංකා නිදහස් පක්‍ෂයේ කිසිම බෙදීමක් නැතැයි ද කී ඇමැතිවරයා ආණ්ඩු පක්‍ෂය සමග සිටින කණ්ඩායමත් විපක්ෂයේ සිටින කණ්ඩායමත් අතර සමීප සම්බන්ධයක් පවතින බව ද සඳහන් කළේය.