දිගින් දිගටම අත්තනෝමතිකව කටයුතු කරමින් සෞඛ්‍ය අංශවලට සහයෝගය නොදී සමස්ත කළුතර ජනතාව අනතුරේ හෙළනවා නම් අටලුගම ජනතාවට තවත් දීර්ඝ කාලයක් හුදෙකළා වී සිටීමට සිදුවේ යැයි කොවිඩ්-19 පැතිරීම වැළැක්වීමේ ජාතික ක්‍රියාන්විත මධ්‍යස්ථාන ප්‍රධානී යුධ හමුදාපති ලුතිනන් ජෙනරාල් ශවේන්ද්‍ර සිල්වා මහතා ඊයේ (04)දින පැවැසීය.
සුළු පිරිසකගේ අත්තනෝමතික ක්‍රියා හේතුවෙන් සමස්ත කළුතර ජනතාවම අනතුරේ හෙළීමට කිසිසේත්ම ඉඩ නොතබන බවත් සෞඛ්‍ය අංශ වෙත පූර්ණ සහයෝගය ලබාදී සමස්ත කළුතර ජනතාවම ආරක්ෂා කරගැනීමට පියවර ගන්නා මෙන් තමා අටලුගම ජනතාවගෙන් ඉල්ලා සිටින බවත් යුද හමුදාපතිවරයා සඳහන් කළේය.
රජය, සෞඛ්‍ය අංශ සහ ආරක්ෂක අංශ දිවා රෑ නොබලා දැඩි වෙහෙසකින් යුතුව කොවිඩ්-19 මර්ධනයට ගෙන යන සුවිශේෂි වැඩපිළිවෙළට ඇතැම් සුළු පිරිසක් සහයෝගය නොදී කටයුතු කිරීම සම්බන්ධයෙන් තමා කනගාටු වන බවත් තවදුරටත් සහයෝගය නොදී කටයුතු කරන්නන්ට එළෙස කිරීමට කිසිසේත්ම ඉඩ නොතබන බවත් යුද හමුදාපතිවරයා කීය.