ගෝඨාභය රාජපක්ෂ මහතා ආරක්ෂක ලේකම්ව සිටිය දී සුදු වෑන් යොදා ජනතාව පැහැරගත් බවත්, එම පැහැර ගැනීම්වලට සම්බන්ධ රියැදුරෙකු බව කියන පුද්ගලයෙකු ඇමති රාජිත සේනාරත්න මහතා සමග අද මාධ්‍ය හමුවකට පෙනී සිටියේ ය
එම පුද්ගලයා මාධ්‍ය අමතමින් කියා සිටියේ එසේ පැහැර ගත් අය දත් ගැලවීම, නිය ගැලවීම, උල් ආයුධවලින් ඇනීම ආදී වද හිංසා කල බවයි. පසුව මරා දමන බවත් එම පුද්ගලයන් බඩ කපා කිඹුලන්ට කෑම සදහා වැවකට දැමූ බවත් ඔහු සදහන් කලේය.
ඇමතිවරයා සමග මාධ්‍ය හමුවට සහභාගි වූ තවත් පුද්ගලයෙකු කියාසිටියේ ප්‍රභාකරන්ගේ සල්ලි කොළඹට ගෙන ආවේ තමන් බවත් එම සල්ලි දුන්නේ නැතැයි කියා තමන් පැහැර ගැනීමට ලක් වූ බවය.
මෙම පැහැරගැනීම්වලට පොලිසිය, හමුදාව ඇතුළු ත්රස්ත විමර්ශණ ඒකකය විසින් සිදු කල බවද ඔවුහු පැවසූය.
අවස්ථා කිහිපයකදීම සේනාරත්න මහතා විසින් මෙම පුද්ගලයන් දෙදෙනාට විවිධ උපදෙස් දෙමින් මාධ්‍ය හමුව මෙහෙයවනු දැනට ලැබිණ.
අදාළ පුද්ගලයන් දෙදෙනා පවසන ආකාරයේ අපරාධ සිදුවී ඇත්නම් කළ යුත්තේ ඔවුන් දෙදෙනා නීතිය හමුවට පමුණවා එම සාක්ෂී අනුව අපරාධකරුවන්ට එරෙහිව නීතිය ක්‍රියාත්මක කිරීමය. එහෙත් මාධ්‍ය හමුව අවසානයේ එම පුද්ගලයන් දෙදෙනා අමාත්‍යවරයා සමග එම ස්ථානයෙන් පිටව යනු දක්නට ලැබිණි.
කෙසේ වෙතත් මීට පෙර දේශපාලන වේදිකාවේ චෝදනා එල්ල වූයේ සුදු වෑන් වලින් පැහැරගත් අය කෑමට දැම්මේ ගෝඨාභය රාජපක්ෂ මහතා සුරතලයට ඇතිකළ මිනී මෝරුන්ට බවයි.
ඊයේ පාර්ලිමේන්තු මන්ත්‍රී විමල් වීරවංශ මහතා කියා සිටියේ රාජිත සේනාරත්න මහතා විසින් මේ ආකාරයේ කටයුත්තකට සූදානම් වන බවත් ඔවුන් සඳහා කෝටි ගණනක මුදල් ගෙවීමක්ද සිදුකර ඇති බවත්ය.